Улсын хэмжээнд хаврын тариалалтын ажил үргэлжилж байна. Одоогийн байдлаар нийт 530.4 мянган га-д тариалалт хийжээ. Улаанбуудай, төмсний тариалалт дууссан, малын тэжээл, хүнсний ногооны тариалалт долоодугаар сарын эхний 10 хоног хүртэлх хугацаанд үргэлжлэх төлөвтэй байна.

Тухайлбал, 315.7 мянган га-д улаанбуудай, 46,2 мянга га-д бусад үр тариа, 12.5 мянган га-д төмс, 11.8 мянган га-д хүнсний ногоо, 54.9 мянган га-д малын тэжээл, 89.2 мянган га-д тосны ургамал тариалжээ.

Өнгөрсөн оны мөн үетэй харьцуулахад улаанбуудай тариалалт 59.7 мянган га-аар буюу 18.9 хувиар, хүнсний ногоо 2.4 мянган га-аар буюу 20.6 хувиар, малын тэжээл 20.8 мянган га-аар буюу 37.8 хувиар ахиу тариалалттай, харин бусад үр тариа 13.5 мянган га-аар буюу 29.3 хувиар, төмсний тариалалт 0.5 мянган га-аар буюу 4.1 хувиар, тосны ургамал 37.2 мянган га-аар буюу 41.7 хувиар тус тус бага тариалалттай үргэлжилж байна.

ХХААХҮЯ-наас тариалалтын чанарыг соёололтоор хүлээн авах ажлыг тариалан бүхий 13 аймгийн 79 сумын 943 аж ахуйн нэгж, иргэдийн 318.9 мянган га үр тарианы талбайг хамруулан хийв. Нийт тариалсан талбайн 74.5 хувь буюу 237.7 мянган га талбай хээрийн соёололтоор онц, сайн үнэлгээтэй гарчээ.

Засгийн газрын 2025 оны 47 дугаар тогтоолоор батлагдсан “Атрын-IV тариалангийн тогтвортой хөгжлийн аян”-ыг хэрэгжүүлэх, арга хэмжээний төлөвлөгөөг эрчимжүүлэх, 2026 оны тариалалтыг технологийн хугацаанд үр дүнтэй зохион байгуулах чиглэлээр аймгуудад үүрэг чиглэл өгч зохион байгуулалтын арга хэмжээг хэрэгжүүлж байна.

Нийтэлсэн огноо2026-06-28