БНХАУ-ын зохион бүтээж, үйлдвэрлэсэн C919 зорчигч тээврийн онгоц наймдугаар сарын 12-ноос эхлэн Бээжин-Улаанбаатарын чиглэлд өдөр бүр нислэг үйлдэж эхлэх гэж байна. Энэ нь тус онгоцны олон улсын анхны тогтмол зорчигч тээврийн нислэг болох юм. Нислэгийг БНХАУ-ын үндэсний агаарын тээврийн “Air China” компани үйлдэнэ. Тус компанийн нислэгийн хуваарийн дагуу CA723 дугаартай C919 зорчигч тээврийн онгоц Бээжингийн Капитал олон улсын нисэх буудлаас 15:00 цагт хөөрч, Улаанбаатарын Чингис хаан олон улсын нисэх буудалд 17:15 цагт буухаар төлөвлөгдөж байна. Харин CA724 дугаартай буцах нислэг Улаанбаатараас 18:30 цагт хөөрч, Бээжинд 20:35 цагт газардах аж.

 C919 онгоцны Улаанбаатарын чиглэлд хийх нислэг нь Хятадын дотооддоо хийх нислэгээс гадна хийх гэж буй анхны олон улсын тогтмол нислэг болох юм

Бээжин-Улаанбаатарын агаарын зам 1958 оноос эхтэй бөгөөд одоогоор “Air China” болон Монголын үндэсний агаарын тээврийн “МИАТ” компаниуд тус чиглэлд нислэг үйлдэж байна.

C919 нь БНХАУ-ын дотооддоо үйлдвэрлэсэн анхны үндсэн их биетэй зорчигч тээврийн онгоц юм. Тус онгоцыг төрийн өмчит “Commercial Aircraft Corporation of China” буюу “COMAC” компани үйлдвэрлэдэг бөгөөд “Boeing”, “Airbus” компанийн ижил ангиллын онгоцтой өрсөлдөх зорилготой. Онгоцны үндсэн загвар нь 158-192 зорчигч тээвэрлэх хүчин чадалтай бөгөөд 4,075-5,555 км хүртэлх зайд нисэх боломжтой.

Хятадын Иргэний нисэхийн удирдах газраас 2022 оны есдүгээр сарын 29-нд тус онгоцны загварын гэрчилгээг олгож, анхны C919 онгоцыг мөн оны арванхоёрдугаар сарын 9-нд захиалагчид хүлээлгэн өгчээ. Улмаар 2023 оны тавдугаар сарын 28-нд дотооддоо арилжааны нислэгээ үйлдэж эхэлсэн байна.

2026 оны дөрөвдүгээр сарын эцсийн байдлаар C919 онгоц 42 мянга гаруй арилжааны зорчигч тээврийн нислэг үйлджээ. “Air China” компани одоогоор 12 ширхэг C919 онгоц хүлээн авсан бөгөөд Бээжин-Хонконгийн чиглэлд өдөр бүр нислэг үйлдэж байна. Ийнхүү C919 онгоцны олон улсын тогтмол нислэгийн анхны чиглэл Улаанбаатар болж байгаа нь Хятадын дотоодын агаарын хөлгийн үйлдвэрлэл олон улсын зах зээлд тэлж буйн нэгэн илрэл болж байна.

Нийтэлсэн огноо2026-07-21