ОХУ-ын “Роснефть” компанийн эзэмшдэг Рязань хотын нефть боловсруулах үйлдвэр Украины дроны халдлагын дараа үйл ажиллагаагаа зогсоосон талаар салбарын эх сурвалжууд мэдээлжээ.
Тус үйлдвэрт өнгөрсөн амралтын өдөр болсон халдлагын үеэр газрын тос боловсруулах үндсэн CDU-6 болон CDU-4 төхөөрөмжүүд зогссон байна. Тэдгээрээс CDU-6 нь галд өртсөн бөгөөд жилд 8 сая тонн буюу өдөрт ойролцоогоор 160 мянган баррель газрын тос боловсруулах хүчин чадалтай. Энэ нь үйлдвэрийн нийт хүчин чадлын бараг тал хувийг эзэлдэг байна.
Мөн гурав дахь үндсэн төхөөрөмж болох CDU-3 нь тавдугаар сарын дунд үеэс засвартай байгаа аж. Гэмтсэн төхөөрөмжүүдийг сэргээн засварлахад хэдэн долоо хоног шаардлагатай байгаа аж.
Рязань хотын нефть боловсруулах үйлдвэр нь Москва болон орчмын бүс нутгийг шатахуунаар хангадаг томоохон үйлдвэрүүдийн нэг. Тус үйлдвэр энэ онд тавдугаар болон долдугаар сард мөн дроны халдлагад өртөж байсан бөгөөд долдугаар сарын халдлагын дараа 2-3 долоо хоног үйл ажиллагаагаа зогсоож байжээ.
Украин ОХУ-ын нефть боловсруулах үйлдвэрүүд болон шатахуун нийлүүлэх дэд бүтцэд хийх дроны халдлагаа сүүлийн саруудад эрчимжүүлээд байгаа. Үүний улмаас Оросын дотоодын шатахууны үйлдвэрлэл буурч, зарим бүс нутагт нийлүүлэлтийн хүндрэл үүсээд байна.
Энэ нөхцөл байдал Монголын шатахууны зах зээлд анхаарах ёстой эрсдэл болж байна. Учир нь энэ мэт дроны халдлагуудаас шалтгаалан ОХУ-д нефть боловсруулах хүчин чадал доголдож, дэлхийн хэмжээнд дизель түлшний нийлүүлэлт чангарах төлөвтэй байгаа аж. Иймээс Рязань дахь үйлдвэр дахин ажиллагаагаа зогсоосон нь дан ганц Оросын дотоодын асуудал биш бөгөөд ОХУ-аас шатахууны өндөр хамааралтай Монголын хувьд нийлүүлэлт, үнэ болон өвлийн улирлын шатахууны нөөцөд анхаарах шаардлагатайг харуулсан эрсдэл болж байна.
Эх сурвалж: The Moscow Times   
Бэлтгэсэн: Д.Номин

Нийтэлсэн огноо2026-09-13