Нийслэл хотын инженерийн шугам сүлжээний засвар, шинэчлэл, өргөтгөл дуусаж, өвөлжилтийн бэлтгэл 94 хувьтай хангагджээ.

Өвөлжилтийн бэлтгэлийг хангах хүрээнд өнгөрсөн гуравдугаар сараас эхлэн инженерийн хангамжийн байгууллага, харьяа газар, дүүргүүд нийт 573 төсөл, арга хэмжээ хэрэгжүүлж байна. Ийнхүү инженерийн шугам сүлжээний засвар, шинэчлэлийн ажил бүрэн дууссан гэж үзэж байгаа юм. 

Харин өдгөө орон сууцны хороолол доторх салбар шугамын гэмтэл засварлах, бараа материал худалдан авалт 11, 12 дугаар сард хийгдэж, өвөлжилтийн бэлтгэл 100 хувь хангагдах аж. 

Өвөлжилтийн бэлтгэлд гол анхаарсан ажил нь дулааны эрчим хүч. Иймд 10 гаруй томоохон дулааны шугамыг засварлаж шинэчилсэн. Орон сууцны хороолол доторх шугам, авто зам, борооны ус тогтдог байршлуудад засварын ажил хийгдэв. Нийтдээ 80 гаруй км шугам сүлжээ, 130 орчим км авто замын засвар шинэчлэлийн ажлыг гүйцэтгэжээ. 

2025-2026 онд Улаанбаатар хотын хэмжээнд нийт 57.3 км инженерийн шугам сүлжээг өргөтгөн шинэчилжээ. Тухайлбал 16 байршилд 18.7 км дулааны гол шугам сүлжээ болон орон сууцны хороолол доторх 16.1 км шугамд өргөтгөл, шинэчлэл хийсэн бол бохир усны “Туул-1” коллекторын 6 км шугам, борооны ус зайлуулах 17.1 км шугамыг шинээр угсарсан байна. 

Нийтэлсэн огноо2026-10-21