Мэдээ мэдээлэл

2019 оны I улиралд Монголд ирсэн жуулчдын тоо өмнөх оноос 6.9 хувиар өсжээ www.bloombergtv.mn

2019 оны эхний улиралд улсын хилээр орж ирсэн гадаадын зорчигчдын 85.1 хувь нь буюу 75.4 мянга нь аялал, жуулчлалын зорилгоор зорчсон гэж Үндэсний статистикийн хороо мэдээллээ. Жуулчдын тоо өмнөх оны мөн үеэс 6.9 хувиар өссөн байна.

Улсаар нь авч үзвэл Хонгконг, Тайвань, БНАСАУ, Австрийн жуулчдын орох урсгал өмнөх оноос өсөж, харин Турк, Индонез, Испани улсын жуулчдын тоо буурчээ. Үүнээс гадна давхардсан тоогоор 548.8 мянган иргэн 2019 оны эхний улиралд гадаадад зорчсоноос 72 хувь нь хувийн журмаар зорчсон байна. Жуулчдыг дагаж орж ирсэн мөнгөн урсгал оны эхний хоёр сард өссөн дүнгээр 26.8 сая ам.доллар хүрсэн байна.

Харин Монголоос гарсан урсгал үүнээс зургаа дахин өндөр буюу 175 сая орчим ам.доллар байгааг төлбөрийн тэнцлээс харж болох юм. Өвлийн улиралд гадаадын жуулчдаас орж ирэх мөнгөн урсгал бусад улиралтай харьцуулахад бага байдаг. Зуны улиралд ялангуяа 7, 8 дугаар сард аялал, жуулчлалын гарах урсгалаас орох урсгал нь илүү давдгийг өнгөрсөн оны тоон үзүүлэлтээс харж болохоор байна. Мөн өнгөрсөн онд 529.3 мянган жуулчин хүлээн авсан нь жилийн дүнгээр 11 хувиар өссөн үзүүлэлт болжээ.

Монгол Улс аялал, жуулчлалыг хөгжүүлэх үндэсний хөтөлбөрийг баталж, аялал, жуулчлалыг эдийн засгийн тэргүүлэх салбар болгохоор зорьж байна. Энэ хүрээнд 2025 он гэхэд жуулчдын тоог хоёр саяд хүргэж, Дэлхийн аялал, жуулчлалын зөвлөлөөс гаргасан аялал, жуулчлалын өрсөлдөх чадварын үзүүлэлтийг 99 дүгээр байрнаас 85 дугаар байрт хүргэх боломжтой гэж үзэж байгаа юм.

Нийтэлсэн огноо2019-04-19

Категори

Үйл явдал

2019 оны I улиралд Монголд ирсэн жуулчдын тоо өмнөх оноос 6.9 хувиар өсжээ www.bloombergtv.mn

Үйл Явдал

Мэдээ

Facebook