Залуучуудын хөгжлийг дэмжих, залуу гэр бүлийг орон сууцжуулах бодлогыг Засгийн газрын хуралдаанаар хэлэлцэв

Орон сууцны урьдчилгаа төлбөр бүрдүүлэхэд зориулсан орон сууцны урьдчилгаа төлбөрийн хадгаламж бий болгох саналтай байгаагаа Гэр бүл, хөдөлмөр, нийгмийн хамгааллын сайд Л.Энх-Амгалан Засгийн газрын ээлжит хуралдааны үеэр мэдэгдлээ.

Мөн орон сууцны зээлийн урьдчилгаа төлбөрийн 50 хувийг Зээлийн батлан даалтын сангаас санхүүжүүлж залуу гэр бүлийг орон сууцжуулахад анхаарна гэсэн байна.

Ипотекийн зээлийн хөтөлбөрийг 2013 оноос хэрэгжүүлснээс хойш нийлүүлэлтийг нэмэгдүүлэхгүйгээр, эрэлтийг огцом өдөөж зах зээл дэх байрны үнийг нэмэгдүүлсэн гэдгийг мөн онцоллоо. Ингэснээр ипотекийн зээл зорилтот бүлэгтээ чиглэхгүй, орлого өндөртэй, урьдчилгаа төлбөр төлөх чадвартай иргэдийг хамруулах болсон байна.

СЭЗИС, Монголын ипотекийн корпорацын хамтарсан "Орон сууцны санхүүжилтийн өнөөгийн байдал, боловсронгуй болгох арга зам" судалгаанд дурдсанаар ипотекийн зээлийн хүртээмж нэмэгдэх ёстой байтал эсрэгээрээ багасаж, иргэдэд ирэх үнэ, зардлын ачаалал улам нэмэгдсэн аж.

Судалгаанд онцолсноор 2013 онд хөтөлбөр анх эхлэхэд орон сууцны медиан үнэ 111.4 сая төгрөг байсан нь 2023 онд хоёр дахин өсөж, 222.3 сая төгрөг болоод байна. Харин энэ хугацаанд өрхийн дундаж орлого 2.2 дахин өсжээ.

Монголбанкны мэдээлснээр өнгөрсөн сард нийт 236.4 тэрбум төгрөгийн ипотекийн зээл шинээр олгосон байна.

Энэ нь өнгөрсөн оны мөн үеэс 0.3 хувиар өссөн үзүүлэлт боллоо. Нийт зээл олголтын 63.9 хувь нь Монголбанк өөрийн хөрөнгөөр олгосон зээл байна. Харин үлдсэн 36.1 хувийг орон сууцны ипотекийн санхүүжилтээр олгожээ.

Орон сууцны ипотекийн зээлээр олгосон шинэ зээлийн хэмжээ тайлант хугацаанд өнгөрсөн оны мөн үеэсээ 31.1 хувиар буурсан байна.