Гэр бүл, хөдөлмөр, нийгмийн хамгааллын яам, Азийн бүтээмжийн байгууллага, Монголын бүтээмжийн холбоо хамтран “Бүтээмжийн хувьсал” чуулганыг өнөөдөр зохион байгууллаа.

Тус чуулган үндэсний бүтээмжийн үзэл баримтлалыг тодорхойлж, үндэсний хэмжээнд бүтээмжийн хөдөлгөөнийг эрчимжүүлэх зорилготой.

Азийн бүтээмжийн байгууллагын гишүүн орнуудын хөтөлбөрийн газрын дарга Арсёони Буено хэлэхдээ, “Монгол Улс боловсролын чанарыг дээшлүүлэхэд анхаарах хэрэгтэй. Их дээд сургууль төгсөгчид ажлын байран дээр шууд ажиллах ур чадвартай байх хэрэгтэй. Энэ бол хөдөлмөрийн зах зээлтэй холбоотой. Мөн Монгол Улс хөдөлмөрийн зах зээлийн мэдээллийн системийг бий болгох хэрэгтэй. Энэ бол хөдөлмөрийн зах зээлийн эрэлт нийлүүлэлтийг зохицуулахад чухал ач холбогдолтой” гэв.

Өнөөдрийн байдлаар Монгол Улсын хөдөлмөрийн дундаж бүтээмж дэлхийн дунджаас 3.6 дахин, БНСУ-аас 5.4 дахин бага байна.

Хөдөлмөрийн бүтээмж, цалин хөлс шууд хамааралтай. Манай улсад уул уурхай, мэдээлэл технологийн салбар хамгийн их бүтээмжтэй, цалин өндөр байна. Тиймээс бүтээмжийн хувьсгалыг өрнүүлж,төр, хувийн хэвшлийн бүх түвшинд бүтээмжийг нэмэгдүүлэх бодлого, зохицуулалт, арга хэмжээг төлөвлөж хэрэгжүүлнэ гэж ГБХНХ-ын сайд Л.Энх-Амгалан тодотгов.

ГБХНХЯ-наас оюуны хөдөлмөрийг дэмжиж, цахим болон зайнаас ажиллах ажлын байрыг нэмэгдүүлж, Монгол хүний хөдөлмөрийн бүтээмж, цалин хөлсийг жил бүр нэмэгдүүлэхээр төлөвлөжээ. Мөн хөдөлмөрийн аюулгүй байдлыг бүх түвшинд баримталсан зохистой ажлын байрыг бий болгож, бүтээмжийн экосистемийг бий болгох аж.