"Инвескор" Санхүүгийн групп найман улсад, 14 салбар компанитай үйл ажиллагаагаа явуулж байна

“Инвескор” Санхүүгийн групп дэлхийн хамгийн том, олон улсын хөрөнгийн биржүүдийн нэг Лондоны Хөрөнгийн биржид (LSE)-д албан ёсоор бүртгүүлснээ мэдээллээ. Ийнхүү тус биржид бүртгүүлсэн Монголын анхны санхүүгийн компани болж байна. Өнөөдрийн байдлаар Лондоны Хөрөнгийн биржид 70 гаруй улсын 2700 гаруй компани хувьцаагаа арилжаалж байгаа аж.

“Инвескор”-ийн зүгээс үйл ажиллагаагаа олон улсын түвшинд өргөжүүлэх, Монголын санхүүгийн зах зээлийг таниулахыг зорьж буйг тодотгоод олон улсын хөрөнгө оруулагчдад дотоодод хийх хөрөнгө оруулалтын боломжийг нээж, компанийн үйл ажиллагааг олон улсын түвшинд өргөжүүлэхэд чухал алхам болж буйг онцоллоо.

“Инвескор” Санхүүгийн групп Монголд төдийгүй Төв Азийн санхүүгийн зах зээлд нэвтэрч, одоогоор найман улсад 14 охин компанитай үйл ажиллагаагаа явуулж байна. Тус групп 2016 оноос хойш үйл ажиллагаагаа үндсэн чиглэл болох Банк бус санхүүгийн байгууллагаас гадна андеррайтер, брокер, үл хөдлөх, хөрөнгө оруулалтын сангийн чиглэлд тэлжээ.

“Инвескор ББСБ” ХК-ийн хувьд 2019 онд нийт хувьцааныхаа 15 хувийг олон нийтэд санал болгож, Монголын Хөрөнгийн биржийн түүхэн дэх хувийн хэвшлийн хамгийн том IPO-ийг хийж байсан юм.