Төв аймгийн Сэргэлэн сумын нутаг дэвсгэр, Хөшигийн хөндий чиглэлд барих тээвэр логистикийн төв, терминал хүрэх төмөр замын барилгын ажлыг энэ сарын сүүлээр эхлүүлнэ.
Шинээр барих салбар төмөр зам нь “Улаанбаатар төмөр зам” ХНН-ийн “Багахангай” өртөөнөөс салбарлан Төв аймгийн Сэргэлэн сумын урдуур дамжин, Олон улсын шинэ нисэх онгоцны буудлын урагш чиглүүлэн төлөвлөж байгаа шугам юм. Төмөр замын шугам нь 102 км урт дан замтай, 2 өртөө, 4 зөрлөгтэй, 2,5 км урт орчим гүүрэн байгууламжтай байх бөгөөд барилгын ажлыг наймдугаар сарын 20-ноор дуусгахаар төлөвлөж байгаа аж.
Зам, тээврийн сайд Б.Дэлгэрсайхан “Багахангай-Хөшигийн хөндий” чиглэлийн салбар төмөр зам барих ажлаар төмөр замын компаниудын удирдлагуудтай зөвлөлдөх уулзалтыг хийж, Хөшигийн хөндийд “Эдийн засгийн чөлөөт бүс, үйлдвэржилт, тээвэр логистикийн бүс бүхий 150 мянган хүн суурьших дагуул хот байгуулахаар төлөвлөж байгааг онцлоод, тус тээвэр логистикийн төв, терминал хүрэх төмөр замын барилгын ажилд дотоодын компаниудаа дайчилж, монгол инженерүүдийн гараар энэ ажлыг богино хугацаанд чанартай хариуцлагатай хийхийг танилцууллаа.
Мөн төмөр замын компаниудын сонирхсон асуултад хариулж, хариуцлагатай харилцан уялдаатай хамтран ажиллахыг тодотгоод Багахангай-Хөшигийн хөндий чиглэлийн төмөр замын барилгын ажлыг дуусгах талаар санал солилцож, хамтран ажиллах боломжийг ярилцав. Тэрбээр, салбарын дэд бүтэц, тээвэр логистикийг хөгжүүлэх зэрэг салбарын гүйцэтгэх үүрэг оролцоо нэмэгдэж буйг онцлоод, Зам тээврийн яамнаас энэ онд хэрэгжүүлэх  томоохон төслүүдэд хамтран ажиллах боломжийг хэлэлцсэнийг ЗТЯ мэдээлэв.
Уулзалтад авто зам, гүүрний чиглэлээр үйл ажиллагаа эрхэлдэг компаниудын төлөөллөөс бүрдсэн 100 гаруй мэргэжилтэн оролцжээ.

Нийтэлсэн огноо2025-04-02