Монгол Улс, АНУ-ын худалдааны эргэлт 2024 онд 701.5 сая ам.доллар хүрч, худалдааны тэнцэл 368.7 сая ам.долларын алдагдалтай гарчээ
АНУ Монгол Улсын импортын бараа, бүтээгдэхүүнд 10 хувийн тариф ногдууллаа. Дональд Трампын тарифын бодлого Монгол Улсад шууд нөлөө үзүүлэхгүй ч БНХАУ-ын эдийн засагт үзүүлж буй нөлөө нь Монгол Улсын эдийн засагт дам нөлөөлж, сорилт дагуулах эрсдэлтэй байгааг эдийн засагчид онцолж байна.
Монгол Улс болон АНУ 2019 онд стратегийн түншлэлийн харилцаа тогтоосон бөгөөд энэхүү харилцаагаа гүнзгийрүүлж иж бүрэн стратегийн түвшинд хүргэхээр талууд өнгөрсөн онд Вашингтон хотноо яриа хэлэлцээ хийсэн юм. Хэлэлцээний дараах хамтарсан мэдэгдэлдээ хоёр улс цэвэр эрчим хүч, чухал ашигт малтмал, хүнсний аюулгүй байдал, цахим эдийн засаг зэрэг харилцан сонирхсон салбарт хамтын ажиллагаагаа үргэлжлүүлсээр байхыг онцолж байв.
Мөн хоёр улс 2023 онд агаарын харилцааны хэлэлцээр байгуулсан ба шууд нислэг үйлдэх бэлтгэл ажил үргэлжилж байгааг ИНЕГ мэдээлж байсан юм.
Монгол Улс, АНУ-ын худалдааны эргэлт 2024 онд 701.5 сая ам.доллар хүрч, худалдааны тэнцэл 368.7 сая ам.долларын алдагдалтай гарсан байна. Монгол Улс нийт экспортын 1.1 хувь буюу 166.3 сая ам.долларын экспортыг АНУ-д хийсэн нь өмнөх оноос 4.5 дахин өссөн үзүүлэлт болж байна. Боловсруулаагүй болон хагас боловсруулсан алт экспортын дийлэнх хувийг эзэлж байгаа аж.
Харин АНУ-аас импортолж буй бараа, бүтээгдэхүүн өнгөрсөн онд нийт импортод 4.6 хувийг эзэлжээ. Автомашин, тээврийн хэрэгсэл, тэдгээрийн эд анги, химийн бодис, хүнсний бүтээгдэхүүн зэрэг нь импортод өндөр дүн эзэлснийг Гаалийн ерөнхий газрын тайлангаас харж болохоор байгаа юм.
2023 оны байдлаар АНУ-аас Монгол Улсад 680 сая ам.долларын шууд хөрөнгө оруулалт хийснийг Монгол дахь Америкийн худалдааны танхим мэдээлсэн байна. Нисэх онгоц, төмөр зам, уул уурхайн тоног төхөөрөмж, харилцаа холбооны салбарт голлон хөрөнгө оруулжээ.
АНУ-ын санхүүжилттэй томоохон төслүүдээс онцолбол Мянганы сорилтын корпорацын компакт гэрээний хүрээнд нийт 635 сая ам.доллар гэрээ байгуулсан байна. Мөн АНУ-ын Олон улсын хөгжлийн агентлаг 1991 оноос хойш Монгол Улсад 200 гаруй сая ам.долларын тусламж үзүүлжээ.

Нийтэлсэн огноо2025-04-03