Алтны үнэ унц нь 3133 ам.доллароор арилжаалагдаж байна
Монголбанк гуравдугаар сард 281.8 кг үнэт металл худалдан авсан нь өмнөх сараас 56 хувиар буурсан үзүүлэлт болж байна. Харин энэ он гарсаар нийт 2.2 тонн үнэт металл худалдан аваад байгаа нь өмнөх оны мөн үеэс 35.1 хувиар буурлаа. Оны эхнээс өссөн дүнгээр Дархан-Уул аймаг дахь Монголбанкны хэлтэс 55.4 кг, Баянхонгор аймаг дахь Монголбанкны хэлтэс 254.1 кг үнэт металл худалдан авчээ 
Гуравдугаар сард үнэт металл худалдан авсан дундаж үнэ 333 мянга 309 төгрөг байсан нь өмнөх сараас 3.4 хувиар өссөн дүн болов.
Дэлхийн зах зээлд алтны үнэ өсөж байгаа тул Засгийн газар энэ онд “Алт-3” аяныг хэрэгжүүлж, алтны олборлолтыг нэмэгдүүлэхээр төлөвлөж байна. Энэ хүрээнд нөөц нь тогтоогдсон жижиг ордуудыг ашиглалтад оруулна. Аж ахуйн нэгжүүд ордыг ашигласны дараа нөхөн сэргээлт хийхэд санхүүгийн баталгаа гаргавал олборлолтыг эхлүүлэх боломжоор хангахыг Сангийн сайд мэдээлсэн юм.
Энэ оны төсөвт алтны үнийг 1850 ам.доллароор тооцож, 18 тонныг худалдан авахаар төсөөлжээ. Үүнийг 2000 тонноор нэмэгдүүлэхээр төлөвлөж байгаа юм.
Мөн Засгийн газар валютын нөөцийг нэмэгдүүлэхийн тулд гадаадын банк, санхүүгийн байгууллагаас алтны орлогоос эргэн төлөх нөхцөлтэй 300 сая ам.доллар татахаар шийдвэрлээд байна.
Улсын хэмжээнд ашиглалтын тусгай зөвшөөрөлтэй нийт талбайн 17.4 хувийг алтны үндсэн болон шороон орд эзэлж байгааг салбарын статистик мэдээллээс харж болохоор байна. Томоохон ордуудын хувьд 29 жил ашиглах тооцоо гараад байгаа “Хармагтай” уурхай жилд дунджаар 165 мянган унц алт үйлдвэрлэнэ гэж тооцоолж байгаагаа мэдээлсэн юм.
Мягмар гарагийн арилжаагаар алтны ханш дээд түвшнээ шинэчилж, унц нь 3146 ам.доллар хүрлээ. Томоохон хөрөнгө оруулалтын банкнууд алтны ханш цаашид өсөх орон зай бий гэсэн өөдрөг төсөөлөлтэй байна.
2025 гарсаар алтны ханш 19 хувиар өсөөд байгаа юм. Сүүлийн байдлаар “Bank of America” энэ онд алтны үнэ унц нь 3500 ам.доллар хүрнэ гэсэн төсөөлөл танилцуулжээ. Энэ нь одоогийн ханшаас 12 орчим хувиар өндөр байгаа нь “S&P 500 Index”-ийн сүүлийн 20 жилийн хугацааны жилийн дундаж өгөөжөөс өндөр байгаа юм.
Түүнчлэн “Morgan Stanley”, “Goldman Sachs”, “UBS” зэрэг хөрөнгө оруулалтын томоохон банкнууд 2025 онд алтны ханш 3200-3400 ам.доллар хүрнэ гэсэн төсөөлөлтэй байна.

Нийтэлсэн огноо2025-04-02