"Хармагтай" төслийн олборлолт 29 жил үргэлжилж, жилд 75 мянган тонн зэс үйлдвэрлэнэ
Австралийн Хөрөнгийн биржид бүртгэлтэй “Xanadu Mines” компани 2024 онд зэс-алтны "Хармагтай" төслийнхөө урьдчилсан техник, эдийн засгийн үндэслэл болон хайгуулын хөтөлбөрт өндөр ахицтай ажилласнаа санхүү, үйл ажиллагааны тайландаа онцолсон байна.
Зардал багатай, цар хүрээ өргөн
Өнгөрсөн онд тус компани “Хармагтай” төслийн ажилд 17.2 сая австрали доллар зарцуулж, 6.9 сая австрали долларын татварын дараах алдагдал хүлээсэн нь 2023 оныхоос найм орчим хувиар буурсан дүн болжээ.
Өнгөрсөн оны аравдугаар сард “Xanadu Mines” тус төслийн урьдчилсан ТЭЗҮ-ийг танилцуулж, эдийн засгийн үр ашиг сайтай томоохон төсөл болохоор байгааг мэдээлж байсан юм. Уурхайн насжилт 29 жил үргэлжилж, энэ хугацаанд жилд дунджаар 75 мянган тонн зэс, 165 мянган унц алт үйлдвэрлэнэ гэж тооцоолсон байна.
2024 онд нөөцийн шинэчилсэн судалгаагаар уурхайн хүдэр дэх зэсийн боломжит агуулга 0.21 хувь, алтны агуулга 0.17 гр/тонн гэж тогтоож байв. Мөн уурхайн хөгжүүлэлт, боловсруулах үйлдвэр, дэд бүтцэд 840-930 сая ам.долларын хөрөнгө оруулалт хийж, олборлолт эхэлснээс хойш 4-5 жилийн хугацаанд хөрөнгө оруулалтаа нөхнө гэж үзэж байгаа аж.
"Zijin Mining" яаж оролцох вэ?
“Xanadu Mines” компани “Хармагтай” төсөлд БНХАУ-ын “Zijin Mining Group” компанитай стратегийн түншлэл байгуулж, урьдчилсан ТЭЗҮ гаргасныхаа дараа төслийн үйл ажиллагааны удирдлагыг тус компанид ерөнхийдөө шилжүүлж өгөөд байгаа юм. Өнгөрсөн онд төслийн өрөмдлөг, хайгуулд “Zijin Mining Group” 35 сая ам.долларын санхүүжилт олгожээ.
Цаашид үргэлжлэх хайгуул болон инженерчлэл, бүтээн байгуулалт, ашиглалтад хүлээлгэн өгөх ажлыг “Zijin Mining Group” мөн хариуцах юм байна.
Одоогоор “Хармагтай” төслийн 38.25 хувийг эзэмших болсон “Xanadu Mines”-ийг хүлээж буй гол ажлууд гэвэл төслийн эцсийн ТЭЗҮ болон хөрөнгө оруулалтын эцсийн шийдвэр (FID) байна. Үүгээр төсөлд эзэмшдэг хувьдаа санхүүжилт татах, гуравдагч талд эзэмшлийн хувиа зарах, хамтарсан компанид эзэмшдэг бүх хувиа зарах гэсэн стратегийн алхмуудаас сонголтоо хийх аж.

Нийтэлсэн огноо2025-04-02