Оны эхний хоёр сарын байдлаар улсын хэмжээнд 405.3 мянган хүн өндөр настны тэтгэвэр авчээ
10 даатгуулагчид ногдох тэтгэвэр авагчийн тоо 2024 онд тав байсан бол 2030 он гэхэд долоо  болох тооцоолол байгааг Дэлхийн банкны тайланд тодотгосныг Гэр бүл, хөдөлмөр, нийгмийн хамгааллын яам мэдээллээ.
Нийт хүн амд ахмад настнуудын эзлэх хувь нэмэгдэж байгаа тул тэтгэврийн тогтолцоог шинэчилж, хагас хуримтлалын тогтолцоо руу үе шаттай шилжих, мөн олон давхаргат тэтгэврийн тогтолцоог нэвтрүүлэхийг зорьж буйг салбарын сайд онцолж байна.
Оны эхний хоёр сарын байдлаар улсын хэмжээнд 405.3 мянган хүн өндөр настны тэтгэвэр авсан нь өмнөх оны мөн үеэс 3.7 хувиар өссөн үзүүлэлт болжээ. Нийт 724.5 тэрбум төгрөгийг өндөр настны тэтгэвэрт олгосон нь өмнөх оны мөн үеэс 29.7 хувиар нэмэгдсэнийг Үндэсний статистикийн хороо мэдээлж байв. Энэ онд Нийгмийн даатгалын тэтгэврийн сангаас 5.3 их наяд төгрөгийг тэтгэвэрт олгохоор тусгажээ.
7-1.JPG
Нийгмийн даатгалын сангаас олгох тэтгэврийн тухай хуульд “Тэтгэвэр авагчийн тэтгэврийн хэмжээг өмнөх оны инфляцын жилийн дундаж түвшинтэй уялдуулж жил бүрийн нэгдүгээр сарын нэгний өдрөөс эхлэн нэмэгдүүлнэ” гэж заасан. Хуулийн дагуу тэтгэврийн доод хэмжээг шинэчлэн тогтоосноор 505 мянга орчим тэтгэвэр авагчийн тэтгэврийн хэмжээг зургаан хувиар нэмэгдүүлээд байна.
Нийгмийн даатгалын сангаас олгох бүрэн тэтгэврийн доод хэмжээг 689 мянган төгрөгөөр, нийгмийн даатгалын сангаас олгох хувь тэнцүүлэн тогтоосон тэтгэврийн доод хэмжээг 572 мянга 400 төгрөгөөр  шинэчлэн тогтоогоод байгаа юм. Ингэснээр дундаж тэтгэврийн хэмжээ 848 мянган төгрөг болж нэмэгдээд байна.
Мөн эхнэр, нөхрөө алдсан ахмадууд өөрийн тэтгэвэр дээрээ 20 хувийн нэмэгдэл авдаг болох тогтолцоонд шилжээд байгаа юм.

Нийтэлсэн огноо2025-04-07