"Тавантолгой” компани 2024 онд 2.3 сая орчим тонн нүүрс экспортолсон бөгөөд тонн нүүрсийг дунджаар 140 ам.доллароор борлуулжээ
“Тавантолгой” ХК 2024 онд 2.3 сая тонн нүүрс экспортолсон нь Монгол Улсын нүүрсний нийт экспортын 2.7 хувийг бүрдүүлснийг аудитлагдсан үйл ажиллагааны тайландаа мэдээллээ. Экспортолсон нүүрсний хэмжээ нь өмнөх оныхоос найман хувиар буурсан байна. Түүхий эдийн үнийн өсөлт болон бараа, бүтээгдэхүүний нийлүүлэлтийн хомсдолоос шалтгаалан хөрс хуулалтын зардал өсөж, ажил удаашралтай байсныг тайландаа тодотгожээ.
Өнгөрсөн оны IV улиралд гадаад зах зээлийн нөхцөл байдлаас шалтгаалан борлуулалт нь эрс буурч, биржээр зарласан арилжаа амжилтгүй болсон. Мөн валютын ханшийн өсөлт борлуулалтын орлогод нь шууд нөлөөлсөн байна.
Түүнчлэн тус компани өнгөрсөн онд 1.1 их наяд төгрөгийн борлуулалтын орлоготой ажилласан бол 412.3 тэрбум төгрөгийн цэвэр ашигтай ажилласнаа мэдээлсэн юм. 
Өнгөрсөн оны эцсийн байдлаар “Тавантолгой” ХК-ийн 51 хувийг орон нутаг, 19.78 хувийг “Ажнай корпорац”, 16.31 хувийг нь “Шандас импекс”, үлдсэн хувийг нь жижиг хувьцаа эзэмшигчид эзэмшиж байгаа аж.

Нийтэлсэн огноо2025-04-05