Экспортолсон нүүрсний биет хэмжээ өмнөх сараас 6.1 сая орчим тонноор нэмэгджээ
Энэ он гарсаар дөрөвдүгээр сарын хоёрны байдлаар 16.3 сая тонн чулуун нүүрс экспортолсон нь өмнөх оны мөн үеэс 10.5 хувиар буурсныг Гаалийн ерөнхий газар мэдээллээ. Экспортолсон нүүрсний биет хэмжээ өмнөх сараас 6.1 сая орчим тонноор нэмэгдсэн байна.
БНХАУ-д эрэлт буурснаар нүүрсний татан авалт удааширч экспортын гол боомт болох Гашуунсухайтад нүүрсний овоолго үүссэн байгааг салбарын сайд мэдээлж байсан юм.
Нүүрсний экспортыг нэмэгдүүлэхийн тулд биржийн нүүрсний арилжааны үнийг зах зээлийн үнэтэй уялдуулан индексжүүлэх арга хэмжээ авсан байна. Үнийг индексжүүлснээс хойш “Хангад  Эксплорэйшн” болон “Энержи Ресурс” компанийн нийт 83.2 мянган тонн  баяжуулсан коксжих нүүрсийг 46.4 сая юаниар арилжаалсныг Монголын Хөрөнгийн биржийн арилжааны мэдээллээс харж болохоор байна.
Үнийг индексжүүлж, төлбөрийн нөхцөлийг уян хатан болгосноор худалдагч, худалдан авагчдад харилцан ашигтай, мөн эрсдэлийг бууруулсан гэж үзэж байгаа аж. Цаашид биржийн уул уурхайн бүтээгдэхүүний арилжааны журмыг илүү боловсронгуй болгохоор холбогдох хуульд нэмэлт өөрчлөлт оруулах хуулийн төслийг УИХ-д өргөн бариад байгаа юм.

Нийтэлсэн огноо2025-04-04