Өчигдөр Аж үйлдвэр, эрдэс баялгийн сайд Ц.Туваан Монголд агаарын хөлгийн түлш нийлүүлэх засгийн газар хоорондын хэлэлцээрийн төслийг Төсвийн байнгын хорооны хуралдаанд оруулж ирж хэлэлцүүлсэн.
Өнөөдрийн манай “Чингис хаан” нисэх онгоцны буудалд шатахуун хангамжийн байгууламжид агаарын хөлгийн түлштэй хамтад нь ашиглах технологийн шийдэл анхнаасаа байгаагүй гэдэг тайлбарламж хэлсэн бөгөөд 2021 онд ашиглалтад орсон Хөшигийн хөндийн онгоцны буудалд Японы талаас шатахуун цэнэглэх цогцолборын гүйцэтгэлд тусгаагүй гэсэн үг.
Ингэхдээ хуучин нисэх буудал болох "Буянт Ухаа" дээрх шатахуун цэнэглэлтийн цогцолборыг ашиглана хэмээн тооцсон бөгөөд Оросын талаас “Роснефть Аэро” болон Монголын талаас “Сод Монгол” групп хамтран энд олон жил үйл ажиллагаа явуулж ирсэн бөгөөд Роснефть дангаараа манай нисэх онгоцны түлшний 90 хүртэлх хувийг хангаж ирсэн байдаг.
Роснефть манайд 2009 оноос 16 жилийн турш онгоцны түлш борлуулан, нийлүүлж байгаа бөгөөд цаашид шинээр баригдах цогцолборт ийн үргэлжлүүлэн тус компани 75 хувийг нийлүүлж орж ирэх сонирхлоо 2022 онд манай талд анх гаргасан байна.
Дундуур нь өнөөх л зардал нь тэлж, бүтээн байгуулалт нь хумигдаж хойшилсоор байгаа дотоодын газрын тосны үйлдвэрийн асуудлыг Ц.Туваан эш татаж, 2028 он хүртэл ашиглалтад орох боломжгүй учраас өөр сонголтгүй гэх агуулга дурдсан. Хэрвээ 2028 онд дотоодын газрын тосны үйлдвэр ашиглалтад орсны дараа хэрэглээгээ хангахуйц нөхцөл үүсэх юм бол яагаад заавал Роснефть-д 20 жилийн монополь эрхийн давуу байдал үүсгэх ёстой вэ гэдэг асуулт эндээс гарна.
Хэрвээ Роснефть агаарын хөлгийн шатахууны 75 хувь дээр нь орж ирвэл үлдсэн 25 хувь дээр бусад аж ахуй нэгжүүд оруулж ирэх боломжтой гэж байгаа ч дотоодынх байх үгүй нь ч тодорхой бус байна.
Ийм эргэлзээтэй, Оросын ашиг сонирхлыг хэтрүүлэн тусгасан хэлэлцээрийг оруулж ирж байгаа намын гишүүнийхээ асуудлаас АН-ын бүлгийн дарга О.Цогтгэрэл ичив бололтой ажлын 3 хоногийн завсарлага авсан нь маргааш дуусгавар болох юм.
Т.БАТСҮРЭН

Нийтэлсэн огноо2025-04-17