“Улаанбаатар марафон 2025”-д хамгийн бага зай 1.5 км-т гэр бүлээрээ болон тэргэнцэртэй, хараагүй иргэд гүйх боломжтой бөгөөд энэ төрөлд 954 хүн гүйхээр бүртгүүлжээ.

Тодруулбал, 5 км-ийн зайд 2451 иргэн гүйхээр бүртгүүлсэн бол 10 км-ийн зайд 794 хүн бүртгүүлж, хагас марафон буюу 21 км-ийн гүйлтэд 18-34, 35-54, 55-аас дээш насныхан, хөгжлийн бэрхшээлтэй иргэд гэсэн ангилалд 700 хүн бүртгүүлээд байна.

Бүтэн марафон буюу 42 км-ийн зайд 18 болон түүнээс дээш насныхан, хөгжлийн бэрхшээлтэй иргэд гэсэн ангиллаар гүйх бөгөөд одоогийн байдлаар 135 хүн бүртгүүлсэн байна.

Харин бүртгэлийн хураамж нь зай тус бүрээс хамаарч 5.000-90.000 төгрөгийн хооронд байна. Тэгвэл тусгай олимп төрөл буюу 500, 800 метр зайд гүйгчдээс бүртгэлийн хураамж авахгүй юм.

Марафонд гүйх хүсэлтэй иргэдийг https://ulaanbaatar.marathon.mn/ цахим хаяг, “Hipay” аппликейшнээр бүртгэж байна.

Бүртгүүлсэн хүмүүсийн энгэрийн дугаарыг тавдугаар сарын 10-20-нд олгох ажээ.