Үндэсний статистикийн хорооноос Монгол Улсын нийгэм, эдийн засгийн өнгөрсөн сарын үзүүлэлтийг танилцууллаа.
ҮСХ-ны Үнийн статистикийн хэлтсийн дарга Г.Мөнх-Оргил" Хэрэглээний бараа, үйлчилгээний үнэ энэ оны дөрөвдүгээр сард улсын хэмжээнд өмнөх оны мөн үеийнхээс 8.6 хувь, өмнөх сарынхаас 0.3 хувиар нэмэгджээ. 2025 оны дөрөвдүгээр сард өмнөх оны мөн үетэй харьцуулахад хүнсний барааны бүлгийн үнэ 6.8 хувиар, хүнсний бус бараа ны бүлгийн үнэ 9.4 хувиар, барааны бүлгийн үнэ 6.0 хувиар, үйлчилгээний бүлгийн үнэ 17.0 хувиар өсжээ. Улсын инфляцад бензин, түлшнээс бусад импортын барааны үнэ 2.6 нэгж хувиар, мах, хатуу түлшнээс бусад дотоодын барааны үнэ 5.0 нэгж хувиар тус тус нөлөөлсөн байна.
Аж үйлдвэрийн салбарын хувьд нийт үйлдвэрлэл 2025 оны эхний дөрвөн сарын урьдчилсан гүйцэтгэлээр 10.9 их наяд төгрөг болж, өмнөх оны мөн үеэс 1.7 их наяд төгрөгөөр өсжээ. Үүнд уул уурхай олборлолт 1.3 их наяд төгрөг, цахилгаан хий, уур, агааржуулалтын салбар 227.6 тэрбум төгрөгөөр тус тус өссөн нь голлон нөлөөлсөн байна.
Ингэж өсөхөд,
Металлын хүдэр олборлолт 940.5 тэрбум төгрөг,
Чулуун болон хүрэн нүүрс олборлолт 365.5 тэрбум төгрөгөөр тус тус өссөн нь голлон нөлөөлжээ.
ДНБ энэ оны эхний улиралд 19.0 их наяд төгрөг болж, өмнөх оны эхний улиралтай харьцуулахад 2.5 их наяд төгрөгөөр өсжээ. Ингэж өсөхөд уул уурхай, олборлолтын салбарын нэмэгдэл өртөг 1.1 их наяд төгрөгөөр, үйлчилгээний салбарын нэмэгдэл өртөг 1.0 их наяд төгрөгөөр өссөн нь нөлөөлжээ. 2025 оны эхний улиралд 6.2 их наяд төгрөг болж, өмнөх оны эхний улиралтай харьцуулахад 143.9 тэрбум төгрөгөөр өсөхөд хөдөө аж ахуйн салбарын нэмэгдэл өртөг 61.8 тэрбум төгрөгөөр, үйлчилгээний салбарынх 72.2 тэрбум төгрөгөөр нэмэгдсэн нь голлон нөлөөлсөн байна. Харин нэг ажиллагчид ногдох ДНБ 2025 оны эхний улиралд 4.3 сая төгрөг болж, өмнөх оны мөн үеэс 54.5 мянган төгрөгөөр буурчээ. Томсгосон дөрвөн салбараар авч үзвэл, нэг ажиллагчид ногдох ДНБ буюу хөдөлмөрийн бүтээмж 2025 оны эхний улиралд өмнөх оны мөн үеэс уул уурхай олборлолт,хөдөө аж ахуй,үйлчилгээний салбарт өссөн бол үйлдвэрлэл, барилгын салбарт буурсан" гэв.

Нийтэлсэн огноо2025-05-16