Г.Занданшатарын Засгийн газар анхны ээлжит хуралдаанаа хийж байна. Засгийн газрын хуралдаанаар хэлэлцсэн 2025 оны төсвийн тодотголын талаар Сангийн сайд Б.Жавхлан мэдээлэл хийлээ.
Тэрээр "Засгийн газрын хуралдаанд 2025 оны төсвийн тодотголын урьдчилсан танилцуулгыг хийлээ. Ирэх баасан гаригт дахин хуралдаж хэлэлцэхээр боллоо.
Төрийн хэмнэлтийн тухай хуулийн 13.1.1, 13.1.2-т "Тухайн жилийн төсвийн тухай хуульд тусгасан хөрөнгө оруулалтууд гэрээ нь хийгдээгүй бол хэмнэлтэд тооцно" гэсэн агуулгатай зохицуулалт бий. Энэ зохицуулалт 2025 оноос хэрэгжиж эхэлж байгаа. Эхний зургаан сард бүтээн байгуулалт нь эхлээгүй ажил сүүлийн зургаан сард хийгдэнэ гэж байдаггүй. Тавдугаар сарын 31-ний байдлаар 535 тэрбум төгрөгийн төсөл арга хэмжээний гэрээ нь хийгдээгүй байна. Төрийн хэмнэлтийн тухай хуулийн дагуу энэ хөрөнгө оруулалтын зардал шууд хэмнэлт болж байна гэсэн үг. 
Төсвийн орлого тасарснаас үүдэлтэй төсвийн алдагдал жилийн эцэст 2.3 их наядад хүрнэ гэсэн судалгаа байгаа. Үүний 535 тэрбум төгрөг нь Төрийн хэмнэлтийн тухай хуулийн дээрх зохицуулалтын дагуу бий болчихож байна гэсэн үг. Үлдсэн 1.8 их наяд төгрөгийг нь төсвийн тодотголоор зохицуулах шаардлага үүсэж байна.  535 тэрбум төгрөг хөрөнгө оруулалтын зардлаас, 1.8 их наяд төгрөг урсгал зардлаас хасагдана гэсэн үг.
Үндэсний хороод, зарим яамдын харьяа агентлаг зэрэг төрийн байгууллагуудыг татан буулгах, нэгтгэх зэргээр урсгал зардлыг бууруулна.
Төрийн албан хаагчдын тоог 2026 онд есөн хувиар бууруулах тогтоолыг УИХ баталсан. Энэхүү тогтоолыг хэрэгжүүлж төрийн албан хаагчдын тоог цомхотгох ажил энэ удаагийн тодотголоос эхэлнэ. Есөн хувь гэдэг нь 14400 албан хаагч" гэв.

Нийтэлсэн огноо2025-06-19