Рио Тинто групп Төмрийн хүдрийн захирал Саймон Троттыг шинэ гүйцэтгэх захирлаараа томилж, 20 жилийн турш компанидаа ажилласан туршлагатай мэргэжилтнийг олборлолтын үнийн өсөлт, удаан хугацааны өсөлтийн сорилтуудыг даван туулж, томоохон уурхайн группыг удирдах үүрэг даалгаварт гаргажээ.
Өдгөө 50 настай Тротын хувьд Якоб Штаушолмийг орлох бөгөөд Штаушолм нь өнгөрсөн тавдугаар сард гэнэтийн шийдвэр гаргаж, дэлхийд хоёрдугаарт ордог уул уурхайн компанийн гүйцэтгэх захирлын албан тушаалаасаа буухаа мэдэгдсэн юм.
Австралийн иргэн Тротт нь компанийн хамгийн ашигтай бизнес болох төмрийн хүдрийн салбарыг 2021 оноос удирдаж ажилласан бөгөөд тэрээр ирэх наймдугаар сарын 25-нд Лондон руу шилжин ажиллах аж.
"Саймон бол уурхайн салбарыг гүнзгий ойлгодог, үйл ажиллагааны төгөлдөр байдал, бизнесийн үнэ цэнийг бий болгосон шалгарсан удирдагч юм" гэж удирдах зөвлөлийн дарга Доминик Бартони онцолжээ.
Тротт нь Рио Тинто компанийн дэлхийн хэмжээний үйл ажиллагаанууд дээр ажиллаж байсан туршлагатай. Тэрээр Сингапурт компанийн худалдааны газрын захирлаар ажиллаж байсан бөгөөд Австрали, Намиби, АНУ, Канад, Серби зэрэг улсуудад давс, уран, бор, алмаазын салбаруудад ахлах албан тушаалд ажиллаж байв.
"Саймонтай бид сүүлийн 7 жилийн турш нягт хамтран ажилласан. Тэрээр манай хамгийн том бизнесийг бэхжүүлж, Австрали улсад бидний оролцогч талуудтай харилцаа холбоог сайжруулахад томоохон үүрэг гүйцэтгэсэн" гэж Штаушолм LinkedIn-д бичжээ.
Рио Тинто компани гаднын нэр дэвшигчдийг шалгаруулсан ч, гол өрсөлдөгчид нь дотоод ажилтнууд байсан билээ. Тэдгээрийн дотор Рио Тинто компанийн хөнгөн цагааны гүйцэтгэх захирал Жероме Пекрес, мөн Худалдааны газрын дарга Баатарын Болд нар байсан юм.
BY
Х.Бямбажаргал нь МУИС-ийг Олон улсын харилцаа мэргэжлээр төгссөн бөгөөд 2024 оноос iToim.mn сайтад сэтгүүлч, орчуулагчаар ажиллаж байна.

Нийтэлсэн огноо2025-07-18