2026 он Монголын агаарын тээврийн салбарт өсөлт, шинэчлэл, өргөжилтийн жил байх нь тодорхой байна гэж "Travel and tour world" онцолжээ. Энэ онд Монголын агаарын тээвэр салбар дотоодын болон гадаадын олон шинэ чиглэл нээж, нислэгийн давтамжаа нэмэгдүүлэхийг зорьж байгаа нь Монгол Улс Зүүн Ази болон дэлхийн аялал жуулчлалын зах зээлд илүү нээлттэй, өрсөлдөх чадвартай болохын илрэл юм.
Улаанбаатар хот олон улсын жуулчдын гол хаалга хэвээр байгаа бөгөөд шинэ чиглэлүүд нь Монголын аялал жуулчлал, бизнес, хөрөнгө оруулалтын урсгалыг нэмэгдүүлэх стратегийн чухал алхамд тооцогдож байна. Агаарын тээврийг өргөжүүлэх энэхүү бодлого нь Монголын агаарын орон зайг олон улсын зорчигчдод илүү нээлттэй болгох, мөн дотоодын аялал жуулчлалын өсөн нэмэгдэж буй эрэлтэд нийцсэн шинэчлэлийн нэг хэсэг юм.
Air Transat: Торонто–Улаанбаатарын шууд нислэг эхэлнэ
2026 оны хамгийн онцлох үйл явдлуудын нэг нь Канадын Air Transat компанийн Торонто-Улаанбаатарын шууд нислэгийн нээлт юм. Энэхүү нислэг 2026 оны зургадугаар сараас эхлэн долоо хоногт хоёр удаа шууд нислэг үйлдэнэ.
Энэхүү агаарын шинэ зам нь Канад дахь Монголын иргэдийн зорчих боломжоор хангах, Канадын жуулчид болон бизнесийн төлөөлөгчдийн Монгол Улсад ирэх урсгалыг нэмэгдүүлэх, хоёр улсын харилцааг агаарын тээврээр дамжуулан бэхжүүлэх зэрэг олон талын ач холбогдолтой.
Мөн Торонто-Улаанбаатар чиглэлд шууд нислэг нэвтэрснээр Европ болон Ойрхи Дорнодод дамжин нисдэг хуучны маршрутыг орлож, аяллын хугацаа мэдэгдэхүйц багасах юм. Энэ нь Монголын аялал жуулчлал болон гадаадын хөрөнгө оруулалтын урсгалд эерэг нөлөө үзүүлэх давуу талтай.
Hunnu Air: Вьетнам, Хятад руу бүс нутгийн чиглэлээ өргөжүүлнэ
Монголын үндэсний тээвэрлэгчдийн нэг Hunnu Air компани бүс нутгийн тэлэлтдээ анхаарч, 2025 оны сүүлээр Вьетнамын Фукуок, Нячанг руу чартер нислэгүүдээ эхлүүлсэн. Өвлийн улиралд дулаан бүс рүү зорих эрэлт эрс нэмэгдэж байгаа тул эдгээр нислэгүүд 2026 онд үргэлжлэх төлөвтэй байна.
Мөн Hunnu Air Хятадын Хөх Хот руу хийх тогтмол нислэгээ сэргээж, 2026 онд байнгын нислэгээ үргэлжлүүлнэ. Энэ нь Монгол–Хятадын хил орчмын худалдаа, аялал жуулчлалыг нэмэгдүүлэх нэг чухал гарц болж буй.
Хятад, Зүүн Өмнөд Ази руу давтамж нэмэгдэнэ
2026 онд МИАТ компани Монгол Улс бүс нутгийн түвшний агаарын холболтоо эрчимжүүлэхээр зорьж байна. Үүнд: Бээжин, Шанхай чиглэлийн нислэгийн давтамж нэмэгдэх, Ханой зэрэг Вьетнамын хотууд руу нислэгийн боломж өргөжих дотоодын жуулчдын урсгал өсөх соёл, бизнесийн харилцаа гүнзгийрэх зэрэг өөрчлөлтүүд орно. Энэ нь Монголын томоохон аялал жуулчлалын стратегийн нэг хэсэг бөгөөд хөрш орнуудтай эдийн засаг, аялал жуулчлалын хамтын ажиллагааг илүү бодитой болгоно.
Ирээдүйн хөгжлүүд: Европ, Хойд Америк руу нислэгүүд нээгдэнэ
 Монголын Засгийн газар болон Иргэний нисэхийн байгууллага 2026 оноос Европ, Хойд Америкийн шинэ чиглэлүүдийг нэмэх зорилт тавин ажиллаж байна.
Чингис хаан олон улсын нисэх буудалд терминалын өргөтгөл, үйлчилгээний шинэчлэл, зорчигчийн урсгалын удирдлагаа сайжруулах шийдлүүд хийгдэж байгаа нь олон улсын нислэгийн өсөлтийг дэмжих үндэс суурь болно гэж мэргэжилтнүүд дүгнэж байна.
2026 онд Монгол Улс олон улсын түвшинд илүү нээлттэй, илүү холбогдсон орон болох замдаа томоохон ахиц гаргана гэж найдаж байна. Сингапур, Вьетнам, Хятад, Европ болон Хойд Америк руу чиглэсэн шинэ нислэгүүд Монголын агаарын тээврийн салбарын шинэ үеийг эхлүүлж, аялал жуулчлал, бизнес, эдийн засгийн өсөлтөд хүчтэй түлхэц өгөх нь гарцаагүй юм.
Монгол Улс бүс нутгийн аялал жуулчлалын төв болон хөгжихийн төлөө томоохон алхмуудыг хийж эхэлсэн бөгөөд агаарын тээврийн тогтвортой өсөлт энэ зорилтын гол хөдөлгөгч хүчин хэвээр байна гэдгийг тодотгожээ.
By
Сэтгүүлч Г.Батжаргал нь iToim.mn сайтад 2015 оноос ажиллаж байна. Улс төр, нийгэм, эдийн засгийн чиглэлээр мэдээ, мэдээлэл бэлтгэдэг.

Нийтэлсэн огноо2026-01-03