Архангай аймгийн “АРА комплекс”-т өнөөдөр морин тойруулгын хаврын уралдаан нээлтээ хийх гэж байна.

Монголд анх удаа зохион байгуулж буй уг уралдаан энэ сарын 28-ныг хүртэл үргэлжлэх бөгөөд долоо хоног бүрийн баасан, бямба гарагт уралдаан болох юм. Морьдыг гараанаас нэгэн зэрэг гаргах төхөөрөмжтэй олон улсын стандартын 2.4 км урт, 12 метр өргөн морин тойруулгын замтай, явцыг бүрэн харах боломжтой шууд дамжуулалт хийхээс гадна 500 үзэгчийн суудал бүхий орчин үеийн цогцолборт уралдаан болох юм. Уралдах морьдыг 18-аас дээш насны жокей унаач унах бөгөөд оролцогчид 400 мянган төгрөгийн хураамж төлнө. Богино зайн морин тойруулгын уралдааныг олон улсын стандартын дагуу цувралаар зохион байгуулахдаа дөрвөн насны ангиллын морьдыг уралдуулах юм. Урьдчилсан уралдаанаас шалгарсан морьд энэ сарын 28-нд гранпри шагналын төлөө уралдах бөгөөд нийт шагналын сан 120 сая төгрөг. Өнгөрсөн жилийн наймдугаар сард “АРА комплекс” анх удаа “Ара кап” богино зайн морин тойруулгын уралдааныг зохион байгуулсан.

Монголд мэргэжлийн сургалтад хамрагдан үнэмлэх авсан бүртгэлтэй албан ёсны 20 жокей байдаг. Тэгвэл өнгөрсөн хугацаанд Солонгосын мэргэжлийн жокей Жү Хий Вон манай улсад ирж Монголын унаачдыг сургалтад хамруулжээ. Түүний хувьд Солонгос болон Английн морин тойруулгын уралдаанд мэргэжлийн жокейгоор 14 жилийн турш ажиллаж байгаа унаач юм. Энэ хугацаанд олон улсын морин уралдаанд 400 гаруй удаа гараанд оролцож, бодит уралдааны арвин туршлага, өндөр сахилга бат, мэргэжлийн техниктэйгээрээ онцлог. Тэрбээр Монголд зохион байгуулсан сургалтаар мэргэжлийн түвшний онол, техник, болон биеийн жингээ зөв барих, тэнцвэрээ хадгалах зэрэг бүх чухал чадваруудаа дадлагажуулсан бөгөөд морьтойгоо нэг хэмнэлд ажиллах чадварыг богино хугацаанд эзэмшүүлсэн байна. 

Нийтэлсэн огноо2026-03-06