Авлигатай тэмцэх газрын Хяналт шалгалт, дүн шинжилгээний хэлтэс 2026 оны гуравдугаар сарын 16-20-ны өдрүүдэд хийсэн хяналт шалгалтын ажлын дүнгээ танилцууллаа.

Тус хугацаанд нийтийн албанд томилогдохоор нэр дэвшсэн 511 иргэний хувийн ашиг сонирхлын урьдчилсан мэдүүлгийг шалгаснаас 307 мэдүүлгийг хянан шийдвэрлээд байна. Харин үлдсэн 204 нэр дэвшигчийн мэдүүлгийг одоогоор үргэлжлүүлэн хянаж байгаа аж.

Шалгалтын явцад тухайн албан үүргийг гүйцэтгэхэд илт ашиг сонирхлын зөрчил үүсэх нөхцөлтэй нэг нэр дэвшигч илэрсэн. Энэ талаар томилох эрх бүхий албан тушаалтанд албан ёсоор мэдэгдсэн байна. Энэ нь төрийн албанд томилогдох үйл явцад ашиг сонирхлын зөрчлөөс урьдчилан сэргийлэх хяналт үр дүнтэй хэрэгжиж байгааг харуулж буй юм.

Мөн өнгөрсөн хугацаанд иргэн, аж ахуйн нэгж, байгууллагаас ирүүлсэн нийтийн албан тушаалтны авлига, ашиг сонирхлын зөрчилтэй холбоотой нийт 132 гомдол, мэдээллийг хүлээн авч шалгаснаас 25-ыг нь хянан шийдвэрлэжээ. Үлдсэн гомдол, мэдээлэлд холбогдох шалгалтын ажиллагаа үргэлжилж байна.

Хяналт шалгалтын хүрээнд ноцтой зөрчил илэрсэн тохиолдлууд ч байна. Тухайлбал, төрийн өмчид бүртгэлтэй тоног төхөөрөмжийг бусдад дур мэдэн шилжүүлэн өгснийхөө хариуд бэлэн мөнгө авсан, мөн улсын төсвийн хөрөнгө оруулалтаар баригдсан барилгын газрыг хамаарал бүхий этгээддээ шилжүүлсэн зэрэг үйлдлүүд илэрчээ. Эдгээр нь гэмт хэргийн шинжтэй байж болзошгүй тул холбогдох материалыг Авлигатай тэмцэх газрын Мөрдөн шалгах хэлтэст шалгуулахаар шилжүүлсэн байна.

Түүнчлэн төлөвлөгөөт хяналт шалгалтын хүрээнд 17 албан тушаалтны хувийн ашиг сонирхлын болон хөрөнгө, орлогын мэдүүлгийг нарийвчлан шалгасан талаар албаныхан мэдээллээ. Энэхүү ажиллагаа нь төрийн албаны ил тод байдал, хариуцлагыг дээшлүүлэх, авлигаас урьдчилан сэргийлэхэд чиглэж байгааг онцоллоо.

Нийтэлсэн огноо2026-03-25