Монгол Улс НҮБ-ын Цөлжилттэй тэмцэх конвенцын талуудын 17 дугаар бага хурлыг зохион байгуулах эрхийг авсан. Олон улсын өндөр дээд хэмжээний энэхүү бага хурал 2026 оны наймдугаар 17-28-ны өдрүүдэд Улаанбаатарт болно. Манай улс энэ хурлын бэлтгэл ажил хангах хүрээнд улсын төсвөөс 200 гаруй тэрбум төгрөг, нийслэлийн төсвөөс 70-80 тэрбум төгрөг гарган ажиллаж байна. COP17-ын бэлтгэл ажлыг хангах худалдан авалтыг шууд хийхээр болсон бөгөөд төсвийн зарцуулалт ил тод бус байгаа нь асуудал дагуулж байна.
Мөн Монгол Улсын зүгээс COP17 хурлыг даргалах хүнийг одоог хүртэл сонгоогүй, гол асуудлыг хэн хариуцах нь тодорхойгүй байгаа юм. Өмнө нь Ерөнхий сайд Н.Учралыг Эдийн засаг, хөгжлийн сайдаар ажиллаж байх үед нь COP17-ын даргалагчаар томилсон ч тэрээр УИХ-ын дарга болсноор энэ эрх нь түдгэлзсэн. Тиймээс одоо Ерөнхий сайд Н.Учрал Монгол Улсыг төлөөлж COP17 хурлыг даргалах хүнийг томилох ажил хүлээгдэж байна. Өмнөх хурлын жишгийг харахад, нэг бол Байгаль орчны сайд, эсвэл Гадаад харилцааны сайд даргалж байжээ. Монгол Улсын хувьд Гадаад харилцааны сайд Б.Батцэцэгт COP17-г даргалах эрхийг шилжүүлж магадгүй байгаа аж. Гэхдээ эцсийн дүнд хэнийг томилох нь Ерөнхий сайдын бүрэн эрх мэдэлд байна.
Түүнчлэн, Монгол Улс COP17 зохион байгуулах орны хувьд бусад гишүүн орнуудаас дэмжлэг туслалцаа үзүүлэх санал, санаачилга дэвшүүлэн ажиллаж байгаа аж. Энэ хүрээнд зарим орноос 10 гаруй сая ам.долларын санхүүжилт олгохоо мэдэгдэж, манай улсыг дансны дугаараа явуулахыг хүссэнийг БОУАӨ-ийн сайд асан Б.Батбаатар ажлаа хүлээлгэж өгөхдөө мэдэгдэв. Тухайлбал,
Саудын Арабаас 2 сая ам.доллар,
БНХАУ-ын Сетка байгууллагаас 3 сая ам.доллар,
Ассоциациос 1 сая ам.доллартой тэнцэх монгол төгрөг
Люксембургээс 2+5, нийт 7 сая хүртэлх евро
Мөн COP17 чуулга уулзалтын үеэр 200 орчим сая еврогийн хөрөнгө оруулалт хийхээ мэдэгдээд байна.
Ер нь COP17 угтсан мөнгөний урсгал 2025 оноос эхэлсэн бөгөөд төсвийн хөрөнгийг юунд, хэрхэн зарцуулж байгаа талаарх мэдээлэл ил тод биш, дээр нь бүх худалдан авалт шууд хийгдэж байгаа нь хардлага, эргэлзээ бий. Гадаадын орнуудаас олгож буй дэмжлэг, хөрөнгө оруулалтыг юунд зарцуулах, бэлтгэл ажлыг хэрхэн ханган ажиллаж байгаа мэдээлэл ч дутмаг байна. Манай дарга нар COP17 хурлын бэлтгэл нэрээр АСЕМ шиг өөрсдийнхөө л халаасыг зузаатгах вий гэдэг болгоомжлол ч үүсээд байгаа юм.

Ганболд БАТЖАРГАЛ

Сэтгүүлч Г.Батжаргал нь iToim.mn сайтад 2015 оноос ажиллаж байна. Улс төр, нийгэм, эдийн засгийн чиглэлээр мэдээ, мэдээлэл бэлтгэдэг.

Нийтэлсэн огноо2026-04-07