Энэ оны гуравдугаар сарын байдлаар инфляц улсын хэмжээнд 7.4, Улаанбаатарт 7.3 хувь байна. 

Монголбанкны Мөнгөний бодлогын газрын захирал Н.Ургамалсувд "Өнгөрсөн гуравдугаар сард махны үнэ 24 хувиар өссөн. Энэ сард АИ92-оос бусад төрлийн шатахууны үнэ өслөө. Эдгээр нь инфляцад нөлөөлсөн. Цаашид шатахуун, мах, хүнсний ногооны үнэ өсөх эрсдэл байна. Бордооны нийлүүлэлт тасалдвал хүнсний ногооны ургацад нөлөөлнө" гэв. 

Жил бүрийн хавар нийслэлд махны үнийн өсөлтийг сааруулахын тулд нөөцийн махыг 400 орчим цэгт худалдаалдаг. Гэвч энэ сард нийслэл гэлтгүй улс даяар махны үнэ өсөв. Тэгэхээр нөөцийн махыг урьдчилж бэлдэх, улс, нийслэлийн төсвөөс нөөцийн маханд их хэмжээний төсөв зарцуулах арга хэмжээг эргэж харах шаардлагатай болжээ.  

Саяхныг хүртэл инфляцын өсөлтөд шатахуун, импортын бараа голлох нөлөөг үзүүлдэг байв. иймд эдийн аагчид, эрхч аргчид өргөн хэрэглээний барааны үнийн өсөлт биднээс шалтгалааагүй, гадаад орчноос хамаарсан хэмээн тайлбарладаг байв. Тэгвэл энэ нь өөрчлөгдөж, мах, махан бүтээгдэхүүн, хүнс, ус,ундаа гэх мэт дотоодын барааны үнэ инфляцад жин дарах боллоо.       
 
Монголбанкны Ерөнхийлөгч С.Наранцогт "Би ХХААХҮ-ийн сайдтай уулзсан. Энэ салбарт маш их татаас өгсөн. Гэсэн ч хүнсний нийлүүлэлтийн тогтолцоог цогцоор нь сайжруулж чадсангүй. Өнгөрсөн жилүүдэд олгосон их хэмжээний татаасыг цөөн компани авчээ. Ган боллоо гээд бид Үнэ тогтворжуулах хөтөлбөр хэрэгжүүлэхгүй, мөнгөний нийлүүлэлтээ өсгөхгүй. Уг нь хөдөө аж ахуйн салбарынхан усалгааны системтэй болж, гангаас бизнесээ хамгаалсан байх ёстой.

Бид банкууд хөдөө аж ахуйн салбарынханд зээд олговол заавал байлгах нөөцөд зохицуулалт хийх арга хэмжээг л авч чадна" гэв. Улсын төсвийн татаасаар энэ онд нийт 200 тэрбум төгрөгийн зээлийг энэ салбарт олгоно.

Нийтэлсэн огноо2026-04-29