Засгийн газрын өнгөрсөн дөрөвдүгээр сарын 29-ний хуралдаанаар Түлш, эрчим хүчний хараат байдлыг бууруулах, төвийн бүсийн цахилгаан эрчим хүчний өсөн нэмэгдэж буй хэрэглээг дотоодын сэргээгдэх эрчим хүчний эх үүсвэрээр хангах, эрчим хүчний системийн тогтвортой ажиллагааг дэмжих зорилгоор Түлш, эрчим хүчний хараат байдлыг бууруулах тухай тогтоол баталсан. Дээрх тогтоолын хүрээнд таван байршилд нарны цахилгаан станц болон батарей хуримтлуурын систем бүхий төслүүдийг хэрэгжүүлнэ.

Говьсүмбэр аймаг, Сүмбэр сум 50 МВт нарны станц, 30 МВт/100 МВт.ц батарей хуримтлуур
Дундговь аймаг, Сайнцагаан сум 50 МВт нарны станц, 30 МВт/100 МВт.ц батарей хуримтлуур
Булган аймаг, Орхон сум 50 МВт нарны станц, 30 МВт/100 МВт.ц батарей хуримтлуур
Хэнтий аймаг, Хэрлэн сум 20 МВт нарны станц, 15 МВт/40 МВт.ц батарей хуримтлуур
Өвөрхангай аймаг, Хархорин сум 50 МВт нарны станц, 30 МВт/100 МВт.ц батарей хуримтлуур барина.
Дээрх сэргээгдэх эрчим хүчний бүтээн байгуулалтыг өвлийн оргил ачааллаас өмнө буюу энэ оны арван хоёрдугаар сарын 1-нд ашиглалтад оруулахаар төлөвлөсөн. Бүтээн байгуулалтыг улсын төсвөөс санхүүжүүлэхгүй бөгөөд үндэсний компаниуд, аж ахуйн нэгжүүдээ дэмжих хүрээнд Засгийн газар анх удаа Сэргээгдэх эрчим хүчний салбарт өрсөлдөөнт сонгон шалгаруулалт зарласан. Сонгон шалгаруулалтыг нээлттэй, ил тод, цахимаар явуулна. Эрчим хүчний яам сонгон шалгаруулалтын урилгыг вэб сайтдаа байршуулжээ. Бүртгэл нь ирэх сарын 15-нд хаагдана.

Ерөнхий сайд Н.Учрал өнөөдөр Эрчим хүчний яамны холбогдох албан тушаалтнуудтай уулзаж, Засгийн газрын тогтоолоор өгсөн үүрэг даалгаврын биелэлтийн явцтай танилцаж, сэргээгдэх эрчим хүчний асар их нөөцтэй улсын хувьд боломжоо ашиглах ёстой. Нарны станцуудыг төлөвлөсөн хугацаанд ашиглалтад оруулахад анхаарч ажиллахыг даалгав.

Нийтэлсэн огноо2026-05-12