Аж үйлдвэр, эрдэс баялгийн яамнаас шатахуунтай холбоотой цаг үеийн асуудлаар мэдэглэл хийлээ.

АҮЭБЯ-ны төрийн нарийн бичгийн дарга Б.Дашпүрэв: Шатахууны хомсдол үүссэн, хөдөө орон нутагт автобинзений тасалдал үүссэн нөхцөл байдалтай байна. ОХУ болон Ойрх Дорнодын мөргөлдөөний нөхцөл байдлаас шалтгаалан газрын тосны үнэ, нөөц, хангамж доголддог.

Шатахууны нөөцийн сав хүрэлцээгүй байгаагийн улмаас доголдол үүсэж байгаа.

Өнөөдрийн байдлаар АИ-92 автобензин 15 хоногийн буюу 31 мянган тонн, дизель түлш 80 мянган тонн буюу 20 хоногийн нөөцтэй байна.

БНХАУ-тай АИ-92, АИ-95, Евро-5 төрлийн 6000 тонн автобензин авах тохиролцоо хийсэн. Өнөөдөр аж, ахуй нэгжүүд өөрсдийн авах хүсэлтээ ирүүллээ. Замын-Үүдийн шилжүүлэн ачих төвөөр дамжуулан шатахуун тээвэрлэх бэлтгэлийг хангаад байна. Маргаашаас ачилтууд хийгдээд явна. Онгоцны түлшийн хувьд БНХАУ-аас 3000 тонныг авна. Эхний 1000 тонн бүтээгдэхүүн маргааш мөн хилээр орж ирнэ.

БНСУ-аас бүтээгдэхүүн авахаар Аж үйлдвэр, эрдэс баялгийн сайд Г.Дамдинням өнөөдөр БНСУ-ын талуудтай уулзалт хийж байна. Тус улсаас онгоцны дизель түлш авахаар тохирсон.

Бидний гол нийлүүлэгч ОХУ дотооддоо шатахууны нөөц нь хомосдож, шаардлагатай тохиолдолд гадны улс орноос авах байдал үүссэн байна. Тийм болохоор шатахууны дутагдлыг өөр улсуудаас авч, нөхөхөөр ажиллаж байна. ОХУ-аас татан авалтаа нэмэгдүүлэх хүсэлтээ илгээсэн. Нөөц багассан байдлыг арван хоногийн хугацаанд нөхнө.

Петровисийн нөөц харьцангуй багассан. Шунхлай, Тэс петролиум ХХК нөөц гайгүй, лимитээр олгож байна. Маргаашаас Петровис, Сод Монгол, Тэс Петролиум, Шунхлай зэрэг томоохон импортлогч компаниуд дээр нөөц нэмэгдүүлэх, татан авах ажлуудыг эрчимжүүлэн зохион байгуулах гэж байна. Ингэснээр шатахууны түгээлт нэмэгдэж, нөхцөл байдал шат дараатайгаар цэгцэрч, зөөлөрнө гэж харж байна.

Батхуяг МӨНХЗУЛ

Нийтэлсэн огноо2026-07-31