ЭЗХЯ: Чөлөөт худалдааны түр хэлэлцээр байгуулах бэлтгэл ажил хангагдаж байна

Монгол Улс Евразийн эдийн засгийн холбоотой чөлөөт худалдааны түр хэлэлцээр байгуулах бэлтгэл ажил дуусах шатандаа явж буйг Эдийн засаг, хөгжлийн яам мэдээллээ.

Тус хэлэлцээрийг эцэслэн баталж, хөнгөлөлттэй нөхцөлөөр бүтээгдэхүүн импортолж эхэлбэл үндэсний үйлдвэрлэгчид зах зээлээс шахагдах нөхцөл үүсэж болзошгүйг МҮХАҮТ тодотгож байна. Тиймээс хэрэглээний гол нэрийн зарим бүтээгдэхүүнд квот тогтоох, хэлэлцээрийг эцэслэн батлахаас өмнө худалдааны төлөөлөгч байгууллага болон бизнес эрхлэгчдийн саналыг сонсох нь зүйтэй гэж үзэж буйгаа илэрхийллээ. Тухайлбал: Засгийн газар өнгөрсөн тавдугаар сарын нэгнээс гурилын импортын татварыг тэглэснээр дотоодын гурилын үйлдвэрлэл аравдугаар сар гэхэд 30 орчим хувиар буурсныг салбарын яам мэдээлж байв. Зарим аж ахуйн нэгжийн хувьд борлуулалт нь 30-80 хувиар буурсныг онцолж байсан юм.

Евразийн эдийн засгийн холбоотой байгуулах гурван жилийн хугацаатай түр хэлэлцээрийн хүрээнд 375 нэр төрлийн бүтээгдэхүүнийг харилцан хөнгөлөлттэй нөхцөлөөр импортлохоор урьдчилсан байдлаар тохиролцсон байна.

Гаалийн татвар тэглэгдэх барааны жагсаалтад өндөг, улаанбуудай, малын тэжээл, сүү сүүн бүтээгдэхүүн, хүнсний ногоо, жимс зэрэг багтаж байгаа аж.

Харин Монгол Улсаас ноос ноолуур, арьс шир зэрэг хөдөө аж ахуйн гаралтай түүхий эд, бүтээгдэхүүнийг татварын хөнгөлөлттэйгөөр экспортлох юм.

Евразийн эдийн засгийн холбооны улсуудаас Монгол Улс ОХУ-аас голлон бүтээгдэхүүн импортолдог. Одоогоор Монгол Улс, ОХУ-ын худалдааны тэнцэл 97:3-ийн харьцаатай байна. ОХУ-аас импортолж буй бараа, бүтээгдэхүүнд дунджаар таван хувийн татвар ногдуулж байгаа бол ОХУ-д экспортлоход 50 орчим хувийн татвар төлж байгааг Эдийн засаг, хөгжлийн яам мэдээллээ.