Гашуунсухайт-Ганцмод боомтын хил холболтын төслийг урагшлуулах асуудлаар Засгийн газар БНХАУ-ын талтай өнгөрсөн сард хэлэлцээ хийсэн юм

Засгийн газрын ээлжит бус хуралдаанаар УИХ-д өргөн мэдүүлэхээр бэлтгэж буй “Orano Mining” компанитай байгуулах хөрөнгө оруулалтын гэрээ болон Гашуунсухайт-Ганцмод боомтын хил холболтын төслийн асуудлыг хэлэлцсэнийг Засгийн газрын ХМОНХХ мэдээллээ. Мөн нийслэлийн авто замын түгжрэл, агаарын бохирдлын асуудал, Баялгийн сангийн тухай хэлэлцсэн байна.

“Orano Mining”-тай байгуулах хөрөнгө оруулалтын гэрээг энэ онд багтаан УИХ-д өргөн барьж, ирэх оны I улиралд гэрээ байгуулахаар төлөвлөж буйг Аж үйлдвэр, эрдэс баялгийн сайд өмнө нь мэдээлж байв.

Засгийн газар дээрх гэрээнд үндэслэн Цөмийн энергийн тухай хуульд нэмэлт өөрчлөлт оруулсан юм. Хуульд Төрийн эзэмшлийн 34 хувийг тусгай АМНАТ-өөр орлуулах, энгийн хувьцааг давуу эрхийн хувьцаа болгох нөхцөлийг бүрдүүлж, суурь, тусгай АМНАТ-ийг тус бүр таван хувь, өсөн нэмэгдэхийг нь зах зээлийн үнээс хамааран 0-9 хувь байхаар зохицуулсан.

Харин Гашуунсухайт-Ганцмод боомтын хил холболтын төслийг урагшлуулах асуудлаар Засгийн газар БНХАУ-ын талтай өнгөрсөн сард хэлэлцээ хийсэн юм. Хил холболтын ажлыг Монголын талаас “Тавантолгой төмөр зам”, БНХАУ-ын талаас “China Energy” компани гүйцэтгэхээр төлөвлөж байгаа аж.