ЗТЯ: Транзит нислэгээр зорчих иргэдийн тоо нэмэгдсэн учир транзит зочид буудал байгуулна

АНУ руу шууд нислэг үйлдэх ажил бэлтгэл шатандаа явагдаж байгааг МИАТ ТӨХК-ийн Гүйцэтгэх захирал Б.Мөнхтамир ярилцлагадаа дурдсан байна. 2023 оны наймдугаар сард Монгол Улсын Засгийн газар АНУ-ын Засгийн газар хоорондын шууд нислэг хийх агаарын харилцааны хэлэлцээрийг байгуулсан бөгөөд энэ хүрээнд 292 хүний суудалтай, нислэг бүртээ 25 тонн ачаа тээвэрлэх хүчин чадалтай, алсын зайд нислэг үйлдэх “Boeing 787-9 Dreamliner” загварын онгоцыг 2024 оны II улиралд худалдан авч байсан юм.

Үүнээс гадна МИАТ компанийн зүгээс цаашид орон нутгийн нислэгийн давтамжийг нэмэгдүүлэхэд анхаарахаа онцолж байна.

Салбарын яам ч мөн энэ чиглэлд бодлогын хэмжээнд анхаарч байгааг тодотгов. Ингэснээр аялал жуулчлалын салбарын дэд бүтцийг сайжруулах ач холбогдолтой аж.

Одоогоор орон нутгийн найман чиглэлд нислэг үйлдэж байгаа бол олон улсын 20 орчим чиглэлд харилцан нислэг үйлдэж байна. 2024 онд Вьетнам зэрэг гурван улсын чиглэлд шинээр нислэг үйлдэж эхэлснийг Иргэний нисэхийн ерөнхий газар мэдээлж байсан юм.

Covid-19 цар тахлаас хойш Монголын агаарын орон зайгаар дамжин өнгөрөх нислэгийн тоо 67 мянга хүрээд байна. Олон улс болон орон нутгийн хөөрөлт бууралтын тоо 23.5 мянга болжээ.

Үүнээс гадна транзит нислэгээр зорчих иргэдийн тоо 2023 онд 17 мянга байсан бол 2024 онд 40 Тиймээс шинэ нисэх онгоцны буудалд транзит зочид буудал барих ажлыг Төр хувийн хэвшилтэй хамтран явуулахыг зорьж байгаа аж. Цаашид хувийн компаниуд зочид буудлын үйл ажиллагааг нь явуулах зохицуулалттай байхаар төлөвлөж байгааг салбарын яам онцолж байна.

Дашрамд дурдахад, өнгөрсөн 2024 онд нийт хоёр сая гаруй зорчигч Хөшигийн хөндий дэх “Чингис хаан” олон улсын нисэх онгоцны буудлаар үйлчлүүлжээ. “Чингис хаан” олон улсын нисэх буудал Монголын иргэний нисэхийн түүхэнд анх удаа дэлхийн агаарын тээвэрлэгчид, нисэх буудлуудын үйлчилгээнд зэрэглэл олгодог олон улсын агаарын тээврийн судалгаа, үнэлгээний “Скайтракс” аудитын байгууллагаас “4 STAR AIRPORT” батламж гэрчилгээ авсан байна.