Хөгжлийн банк: Олон улсын зах зээлээс 500 сая ам.долларын санхүүжилт татахаар судалж байна

2024 оны байдлаар Хөгжлийн банкны чанаргүй зээлийн үлдэгдэл 1.7 их наяд төгрөг буюу нийт зээлийн багцын 57.5 хувийг бүрдүүлж байна. Сүүлийн гурван жилийн хугацаанд Хөгжлийн банканд бүртгэлтэй 67 зээл байснаас 33 нь буюу 1.8 их наяд төгрөгийн зээл төлөгджээ.

Цаашид Засгийн газартай хамаарал бүхий зээлүүдийг төлүүлэх, баланс шилжүүлэх арга хэмжээ авна гэдгээ мэдээллээ. 2011 онд Хөгжлийн банк үүсгэн байгуулагдсанаасаа хойш нийт 7.8 их наяд төгрөгийн хөрөнгийг олон улсын зах зээлээс босгож дотоодын төслүүдийг санхүүжүүлжээ. Хэдий тийм боловч чанаргүй зээл, улс төрийн нөлөөлөл, Covid-19 цар тахлын улмаас төслүүд гацах, хойшлох эрсдэл байсан гэж дүгнэж байна.

Одоогоор олон улсын зах зээлээс санхүүжилт татахад харьцангуй таатай байгаа бөгөөд 500 сая ам.долларын бонд босгохоор судалж эхэлсэн байна. Мөн санхүүжилт татсаны дараа төсөлд хөрөнгө оруулах бус ТЭЗҮ нь боловсруулагдсан, санхүүгийн хувьд тухайн төслийн 20 хувийг санхүүжүүлэх чадамж бүхий компани, төсөлд бондын хөрөнгөөс зээл олгох нь зүйтэй гэж Хөгжлийн банкны Гүйцэтгэх захирал тодотгов.

Хөгжлийн банк нь зээл олгох, төсөл санхүүжүүлэх, эх үүсвэр татан төвлөрүүлэх үндсэн үйл ажиллагаагаа хэрэгжүүлэлгүй зогсонги байдалд орсон бөгөөд санхүүгийн байгууллага хэлбэрээр нь ажиллуулахад эрх зүйн шинэчлэл хийгдэх хэрэгтэй гэж үзэж байна.