2024 онд даатгалын 7 компани нийт 67 даатгалын гэрээнд хамаарах 931.4 сая төгрөгийн нөхөн төлбөр олгожээ
Санхүүгийн зохицуулах хорооноос танилцуулсан ипотекийн даатгалын үйл ажиллагааны зохицуулалттай холбоотой өөрчлөлтийг ирэх наймдугаар сарын нэгнээс мөрдөж эхлэхийг Монголын ипотекийн корпорац мэдээллээ.
Ипотекийн зээл олгож эхэлснээс хойш хэрэгжиж байсан даатгалын журмын хамгийн том асуудал нь өвчнөөр нас барсан зээлдэгч даатгалаас нөхөн олговор авах боломжгүй байсан юм. Харин одоо өөрчлөгдөж буй журмаар ипотекийн зээлдэгчийн амь нас, эрүүл мэндийг гэнэтийн ослын даатгалд хамруулдгийг болиулж, урт хугацааны даатгалд хамруулахаар болсон байна. Ингэвэл иргэн өвчнөөр нас барвал зээлийг хамт зээлдэгч нь төлөх, зээлээ ганцаараа төлж чадалгүй байраа хураалгах эрсдэлээс сэргийлнэ. Мөн амь нас, эрүүл мэндийн даатгалынхаа гэрээг жил бүр сунгах шаардлагагүй болж байгаа юм.
Санхүүгийн зохицуулах хороонд 2016 оноос хойш очсон даатгалтай холбоотой өргөдөл, гомдлын 84 хувь нь ипотекийн зээл авсан иргэний эрүүл мэнд, амь насны даатгалтай холбоотой байснаас 92 хувийг даатгалын нөхөн төлбөр өгсөнгүй гэх гомдол бүрдүүлж байсан аж.
Ердийн даатгалын үйл ажиллагаа эрхлэх тусгай зөвшөөрөл авсан 17 компаниас 16 компани нь ипотекийн даатгалын бүтээгдэхүүнийг боловсруулж, зах зээл дээр санал болгож байна.
Ипотекийн зээлийн барьцаа хөрөнгийн даатгалын нөхөн төлбөрийн тухайд 2024 оны байдлаар даатгалын долоон компани нийт 67 даатгалын гэрээнд хамаарах 931.4 сая төгрөгийн нөхөн төлбөр олгожээ. Энэ нь өмнөх оны мөн үетэй харьцуулахад 3.5 дахин нэмэгдсэн дүн үзүүлэлт болж байна. Хэдий тийм боловч одоо хүчинтэй байгаа зээлдэгчдийн 57.4 хувь нь л барьцаа хөрөнгөө даатгуулсан үзүүлэлттэй байгаа юм.

Нийтэлсэн огноо2025-04-03