"Туул-1" коллекторын хуванцар хоолойг ширмэн хоолойгоор сольж эхэллээ.
Коллектор 2007 онд барихдаа 19.3 км хуванцар материалтай шугам угсарснаас хойш олон жил болсон тул УСУГ-аас энэ жил 10 км шугам угсрахаар болжээ.
УСУГ-ын дарга Ц.Төрхүү “Нийслэлийн хотын гэр хороололд инженерийн шугам сүлжээнд холбогдоогүй 190 мянга орчим айл өрх амьдарч байна. Гэр хорооллыг орон сууцжуулъя гэвэл дэд бүтцийг шийдэхээс гадна Төв цэвэрлэх байгууламжийг томсгох ёстой. Тухайлбал Төв цэвэрлэх байгууламж хоногт 160-170 мянган шоо метр усыг хүлээн авах хүчин чадалтай ч энгийн үед 210 мянга, зуны улиралд бороо их орохоор 240 мянган шоо метр хүртэлх усыг хүлээн авдаг. Улаанбаатар хотын бохир усны “Туул-1” коллекторын шугам угсралтыг эхлүүлсэн нь шинэ цэвэрлэх байгууламжид холбогдох тул Төв цэвэрлэх байгууламжийн ажлыг түргэвчилнэ. Тавдугаар сард эхний ээлжийн ус таталтыг, наймдугаар сард хоёр дахь удаагийн туршилтын усыг хүлээн авахаар бэлтгэж байна” хэмээв.
“Туул 1” коллектор нь Улаанбаатар хотын бохир усны шугамын ачааллыг авах гол хэвтээ тэнхлэг бөгөөд одоо байгаа, ирээдүйд барих барилга байгууламжийн бохир усыг татан зайлуулах стратегийн ач холбогдолтой инженерийн шугам сүлжээ. Тодруулбал, тус коллектор нь Гачуурт, Хужирбулан, Улиастай, Налайх, Амгалан, Шархад, Дамбадаржаа, Долоон буудал, Баянхошуу, Толгойт, Баянголын ам орчмын хорооллын бохир усыг шууд болон одоо ажиллаж буй Налайхын, өмнөдийн, төвийн болон 23-р коллектороор дамжуулан төв цэвэрлэх байгууламжид хүргэх юм.

Нийтэлсэн огноо2025-04-04