2025 оны эхний гурван сард 15.8 сая тонн чулуун нүүрсийг 1.3 тэрбум ам.доллароор экспортолжээ
Энэ оны I улирлын эцсийн байдлаар гадаад худалдааны тэнцэл 465 сая ам.долларын ашигтай гарч, өмнөх оны мөн үеэс 62 хувиар буурахад чулуун нүүрсний экспортын үнийн дүн буурсан нь голлон нөлөөлсөн байна. Тайлант хугацаанд нийт 15.8 сая тонн чулуун нүүрсийг 1.3 тэрбум ам.доллароор экспортолжээ. 
Харин гадаад худалдааны нийт бараа эргэлт 5.5 тэрбум ам.доллар болсон нь өмнөх оны мөн үеэс 8.3 хувиар буурлаа. Экспортод нийт гурван тэрбум ам.долларын бараа, бүтээгдэхүүн, түүхий эд гаргасан нь өмнөх оны мөн үеэс 17.7 хувиар буурсан үзүүлэлт болж байна. 
Дөрөвдүгээр сарын долооны өдрийн байдлаар нүүрсний экспорт 17.2 мянган тонн хүрснийг Гаалийн ерөнхий газар мэдээллээ. Харин нөгөө талд зэсийн баяжмалын экспорт 24 хувиар нэмэгдэж, 930 сая ам.доллар хүрчээ.
Засгийн газар нүүрсний экспортыг нэмэгдүүлэхээр биржээр арилжиж буй нүүрсний үнийг индексжүүлсэн юм. Дөрөвдүгээр сарын наймны арилжааны мэдээллийг харвал “Эрдэнэс Тавантолгой” болон “Хангад Эксплорэйшн” ХХК-ийн 51.2 мянган тонн коксжих нүүрсийг 16.4 тэрбум төгрөгөөр худалдсан байна.
Үүнээс гадна оны эхний улиралд нийт 2.5 тэрбум ам.долларын бараа, бүтээгдэхүүн импортолсон нь өмнөх оны мөн үеэс 5.5 хувиар өссөн дүн боллоо. Тайлант хугацаанд 560 сая ам.доллароор нефтийн бүтээгдэхүүн импортолсон бол импортод гол жин дарж буй суудлын 36 мянган автомашиныг 327.5 сая ам.доллароор худалдан авсан байна. Суудлын автомашины импортын үнийн дүн өмнөх оны мөн үеэс 30 хувиар нэмэгджээ.

Нийтэлсэн огноо2025-04-09