УИХ-ын чуулганы үдээс өмнөх хуралдаанаар Уул уурхайн бүтээгдэхүүний биржийн тухай хуульл нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслийг яаралтай горимоор оруулж ирж хэлэлцэж байна.
Он гарснаас хойш нүүрсний экспортын гарц нэмэгдсэн хэдий ч нүүрсний үнэ унасантай холбоотойгоор орлого буурсан. Өнөөдрийн байдлаар уул уурхайн бүтээгдэхүүнийг спот, форвард гэрээний дагуу биржээр арилжаалж байгаа бөгөөд арилжаа зогсонги байдалд орж байгаагаас үүдэн холбогдох хуульд нэмэлт,өөрчлөлт оруулах болсон талаар салбарын сайд нь тайлбарлаж буй. Хэлэлцэж буй асуудалтай холбоотойгоор УИХ-ын гишүүд саналаа хэлж, асуулт асууж байна.
УИХ-ын гишүүн Д.Пүрэвдорж,
Уул уурхайн биржээр борлуулах нь зөв. Ямар нэг танил тал гэлгүй биржийн арилжаанд оролцоод нүүрсээ авдаг. Гэтэл яагаад биржээр арилжаа олигтой явахгүй байна гэхээр, жишээ нь биржээр нүүрсээ авсан нөхдүүд “Эрдэнэс Тавантолгой” дээр очоод нэг, хоёр сар болдог. Нүүрс худалдан авсан тал нүүрс өсөж байгаа үед хүлээж боллоо гэхэд нүүрсний үнэ унаж байгаа үед хоёр сар хүлээнэ гэдэг биржээр худалдаад авчихсан компаниудад маш том эрсдэл үүсдэг. Энэ бол санаатай хийгддэг. Яагаад гэхээр УИХ-ын гишүүд дарга, сайд нар “Эрдэнэс Тавантолгой” дээр очоод 500 мянга, сая тоннын гэрээг 2,3 ам.долларын зөрүү авч хийсэн нүүрс нь түрүүлж гардаг. Тийм учраас биржээр нүүрс худалдан авч байгаа компаниудын нүүрс нь гарахгүй уддаг. Яавал нүүрсийг алт шиг үнэтэй болгох вэ гэдэг луйвар “Эрдэнэс Тавантолгой” дээр бүрэн явж байгаа. Биржээр хэдийнэ нүүрс худалдан авчихсан хүмүүсийн урдуур өөр нүүрс гараад байна гэхээр 4500 калоритай нүүрсний гэрээ хийж, үнийг нь төлчихөөд буцаагаад 6000 калоритай нүүрс ачдаг тэр нөхдүүдийн авилга нь төлөгдсөн нүүрс л түрүүлж гардаг байхгүй юу. Өнөөдөр уурхайгаас төмөр замын ам хүртэл 14 км газар 1 сая 78 мянган төгрөгөөр тээвэр хийж байна. Төмөр замаас хил хүртэлх 4 км газарт 1 сая 800 мянган төгрөгөөр дарга нарын компани тээвэр хийж байна. Монголын ард түмэнд ирэх ёстой ашгийг замд нь хулгайлдаг байдал бий болоод байвал яаж “Эрдэнэс Тавантолгой”-гоос ашиг хүртэх вэ. Хүн болгонд 93 мянган төгрөг биш 1 сая төгрөг өгөх боломж бий шүү. Биржийн асуудал чинь ийм учраас явахгүй байгаа" гэв.
Т.БАТСҮРЭН

Нийтэлсэн огноо2025-04-17