Аж үйлдвэр, эрдэс баялгийн сайд Ц.Туваан Засгийн газрын ээлжит хуралдааны дараа сэтгүүлчдэд мэдээлэл өглөө.
Тэрбээр, "Долоо хоног болгон өгдөг Экспортыг нэмэгдүүлэх ажлын хэсгийн мэдээллийг танилцуулъя. Мэдээлэлд дурдсанаар 4-р сарын 22-ны байдлаар уул уурхайн бүтээгдэхүүний биет хэмжээ өссөн дүнтэй буюу 22.9 сая тонн нүүрс гаргасан нь өнгөрсөн оны мөн үеийнхээс нэмэгдсэн гэсэн мэдээтэй байна.
Бичигт боомтоор гаргаж байгаа эрчим хүчний нүүрсний экспорт 2.9 дахин нэмэгдэж 2 сая 100 мянган тонныг экспортолсон. Хятадын зах зээл рүү нийлүүлэгдэж байгаа эрчим хүчний нүүрсний хэрэглээ нэмэгдэж байгаа нь бидэнд 2025 оны үлдэх хугацаан дээрээ 3 сая тонн нүүрс нэмж экспортолж 100 сая ам.доллар олох боломжийг нээж өгч байгаа.
Мөн бүтээн байгуулалтын улирал эхэлж байгаатай холбоотой импорт өссөн дүнтэй харагдаж байна. Валютын нөөц  5.2 тэрбум ам.доллар хэвээр хадгалагдаж байна. Монголбанкнаас  валютын ханшийн өсөлттэй холбоотой интервенц хийгээд явж байгаа.
Өнөөдрийн Засгийн газрын хуралдаан дээр Гашуунсухайт-Ганцмодны боомтын төмөр замын хил холболтын Засгийн газар хоорондын хэлэлцээний компани хоорондын 3 гэрээний хоёр нь манай салбартай холбоотой байгаа.
Нүүрс худалдах худалдан авах гэрээг бүх зүйл дээрээ тохиролцоод 5-р сарын 1 гэхэд эцэслээд нүүрсний худалдааг эхэлнэ гэсэн төсөөлөлтэй явж байна.
Мөн уурхайн хүчин чадлыг нэмэгдүүлэх ажлын хэсэг ажиллаж байгаа. Уг ажлын хэсэг БНХАУ-д очиж хэлэлцээрээ үргэлжлүүлж байна. 5-р сарын эхний хагаст багтаж энэ гэрээ зурагдана гэж хүлээж байна.
УИХ-аар хэлэлцэх эсэх нь яригдаж байсан Уул уурхайн бүтээгдэхүүний биржийн тухай хуулийг Засгийн газраас татаж авсан. Ирэх долоо хоногт дахин Засгийн газрын хуралдаанаар оруулж ирж цаашид хэлэлцэх эсэхийг шийдвэрлэнэ" гэв.
Т.БАТСҮРЭН

Нийтэлсэн огноо2025-04-23