“Эрдэнэс Монгол” ХХК нь 2024 оныг “Хэрэгжилт, үр дүн”-гийн жилээр зарлаж,  2024 оны бизнес төлөвлөгөөндөө стратегийн 4 зорилго, 5 чиглэл, 19 зорилтын хүрээнд 53 үйл ажиллагаа, 69 арга хэмжээг төлөвлөж 92 хувийн гүйцэтгэлтэй хэрэгжүүлсэн байна.  
Гүйцэтгэх захирал С.Наранцогт,  “Үндэсний баялгийн сангийн тухай анхдагч хуулийн төслийг улс төрийн намуудын зөвшилцөл, олон талуудын оролцоог хангаж,  хичээл зүтгэж гарган ажилласны хүчинд УИХ-аар батлуулсан. Хуулийн хэрэгжилтийг хангах хүрээнд Хуримтлалын санд 500.5 тэрбум төгрөгийг төвлөрүүлж, иргэн бүрийг нэрийн данстай болгосон. Мөн "Эрдэнэс Тавантолгой” ХК-ийн  хувьцааны талаар авах зарим арга хэмжээний тухай, “Хууль батлагдсантай холбогдуулан авах зарим арга хэмжээний тухай” зэрэг УИХ, Засгийн газрын тогтоол, шийдвэрийг гаргуулснаар 2012 оны 4-р сарын 11-ний өдрөөс хойш мэндэлсэн Монгол Улсын 900 мянган иргэнд 1072 ширхэг энгийн хувьцааг нэмж эзэмшүүлэх, Эрдэнэс Тавантолгой ХК-ийн 2022, 2023 оны  цэвэр ашгаас улирч буй онд 3.4 сая иргэнд 1.2 их наяд төгрөгийн ногдол ашиг хуваариллаа” гэв. 
“Эрдэнэс Монгол”  нэгдсэн удирдлага, стратеги, зорилготойгоор ажилласнаар нийт 15.9 их наяд төгрөгийн орлоготой, 5.4 их наяд төгрөгийн цэвэр ашигтай, Монгол Улсын гадаад валютын нөөцийн 80 хувийг бүрдүүлэн, 5.2 их наяд төгрөгийг улс, орон нутгийн төсөвт оруулжээ. Өмнөх оноос бүтээгдэхүүн үйлдвэрлэлийн хэмжээ 27 хувиар, хөрс хуулалтын хэмжээ 41 хувиар, нүүрс олборлолт дээд амжилтыг тус тус үзүүлсэн бөгөөд нэгдлийн хэмжээнд биржийн арилжааг нэвтрүүлснээр 186.2 сая долларын нэмэлт орлогыг төвлөрүүлсэн байна.   
Толгой компанийн зүгээс бүрэлдэхүүн компаниудаа  нэгдсэн удирдлагаар хангаж, бизнес төлөвлөгөө, төсөв хөрөнгө оруулалтын төлөвлөгөөнд давхардсан тоогоор 130 удирдамж чиглэл, санал дүгнэлт өгч, менежментийн 7 чиглэлийн 36 төрлийн 1000 үйлчилгээг үзүүлж ажилласан байна.
“Эрдэнэс Монгол” ХХК-ийн ТУЗ-өөс компанийн 2024 оны үйл ажиллагааг “сайн” гэж үнэлснийг  ТУЗ-ийн хараат бус гишүүн Д.Гэрэлмаа танилцуулж, хувьцаа эзэмшигчийн зүгээс уг үнэлгээг баталгаажууллаа.

Нийтэлсэн огноо2025-05-01