Казахстаны Гадаад хэргийн яам хөрөнгө оруулагчийн визийг баталгаажуулах шинэ журам санаачилжээ. "Алтан виз" гэх шинэ журам 10 хоногийн дараачаас эхлэн хэрэгжинэ. Казахстанд доод тал нь 300 мянган ам.долларын хөрөнгө оруулалт хийсэн гадаадын хөрөнгө оруулагчид "алтан виз" авах хүсэлтээ цахимаар гаргах боломжтой. Энэ виз нь хөрөнгө оруулагчдад 10 жил хүртэл оршин суух зөвшөөрөл олгоно.
Ийм төрлийн визний хөтөлбөрүүд Европ, АНУ, Арабын нэгдсэн Эмират, Сингапурт зэрэг оронд өргөнөөр хэрэгжих болсон бөгөөд хөрөнгө оруулалт, технологи, бизнесийн үйл ажиллагааг татах үр дүнтэй хэрэгсэл болох нь ч батлагдсан. Казахстан улс ч бас энэхүү чиг хандлагад нэгдэж буйгаа ийнхүү зарлав.
Төв Азийн орнуудаас ийм виз нэвтрүүлсэн улс ганц Казахстанаар тогтохгүй. Тодруулбал, Узбекистан хөрөнгө оруулагчдын визний журмаа зургадугаар сарын 1-нээс эхлэн хэрэгжүүлэхээр зарлажээ. Тус улсад хамгийн багадаа 200 мянган ам.долларын хөрөнгө оруулалт хийсэн гадаадын иргэдэд таван жилийн оршин суух зөвшөөрөл олгохоор тус журамд заасан байна.
АНУ-ын хувьд доод тал нь таван сая ам.долларын хөрөнгө оруулалт хийсэн гадаадын иргэнд "алтан карт" олгодог билээ.
Эдийн засаг нь чинээлэг тэрбумтнуудаас ихээхэн хамааралтай байдаг тул улс орнууд өндөр орлоготой хүмүүсийг эх орондоо авчрахын тулд ийм визийг үе үе нэвтрүүлдэг.
ЭХ СУРВАЛЖ: Diplomatic Insight