Байгаль орчин, уур амьсгалын өөрчлөлтийн сайд Б.Батбаатар Өвөрхангай аймгийн “Ногоон хэрэм” мод үржүүлгийн талбайд ажиллалаа.
“Ногоон Хэрэм” төсөл нь 2007 оноос эхлэн Монгол Улс болон БНСУ-ын Засгийн газар хооронд хэрэгжүүлж буй уур амьсгалын өөрчлөлтийн эсрэг төсөл юм. Уг төслийн нэгдүгээр ээлж 2007-2016 он хүртэл хэрэгжиж нийт 3046 га-г ойжуулжээ. Өвөрхангай аймгаас гадна Өмнөговь, Төв, Хөвсгөл, Сэлэнгэ зэрэг аймагт төслийн тусгайлсан нэгжүүд байгуулж ойжуулсан байна.
Энэхүү талбайд мод үржүүлж, ойжуулах болон уур амьсгалд тохирсон шилмүүст модны хүлэмжийн үржүүлгийн технологийг туршиж байгаа аж. Хүлэмжийн үржүүлэг нь задгай үржүүлгээс найм дахин чанартай үрсэлгээ болдог байна. Уг талбайд мод үржүүлгээс гадна эмийн ургамал, зарим төрлийн нарийн ногоо зэргийг нутагшуулах төслийн дараагийн үе шатыг гурван жилийн өмнөөс эхлүүлжээ.
Мөн төслийг эрсдэлгүй, үр дүнтэй, тогтвортой хэрэгжүүлэх зорилгоор сургалт мэдээллийн төв бүхий цогц барилга, түймрийн эрсдэлийг эргэн тойрон 40 км радиус дотор мэдэрч дохио өгөх цамхаг, усалгааны ухаалаг систем, хөрс бордооны зоорь зэрэг цогц байгууламжийг Өвөрхангай аймагт байгуулсан байна. Энэ хүрээнд БНСУ-аас мэргэжилтнүүд сургалт, судалгаа, хөгжүүлэлт хийж, орон нутагт энэ чиглэлээр мэргэжилтэн бэлтгэж ажлын байраар хангаж байгаа аж. Хоёр улсын Засгийн газар хооронд хэрэгжүүлж байгаа “Ногоон хэрэм” төсөл хэрэгжсэн талбайг 2026 онд Монголын талд хүлээлгэн өгөх юм. Цаашид тогтвортой үргэлжлүүлэхэд салбарын яамны оролцоо чухал байгааг төслийн удирдлагууд БОУАӨ-ийн сайд Б.Батбаатарт уламжлав.

Нийтэлсэн огноо2025-07-29