Хятадын гангийн томоохон групп болох “Bensteel Group” нь 2025 оны 7-р сард дотоодын хэрэглээнд 1, 2-р зэрэглэлийн коксжих нүүрсний хоёр үе шаттай олон удаагийн хэлэлцээ бүхий нээлттэй худалдан авалтын тендер зарласан байна.
Уг тендерийн зорилго нь ган үйлдвэрлэлийн түүхий эдийн тогтвортой, өндөр чанартай хангамжийг нэмэгдүүлэх зорилготой бөгөөд Хятадын дотоодын нүүрсний ханган нийлүүлэгч компаниудын дунд уг тендерийг зарласан юм.
Харин шинэчилсэн мэдээллээр тус групп нь Монгол Улсаас коксжих нүүрс худалдан авах компанийг шалгаруулах аж.
“Bensteel” –ийн энэхүү нээлттэй тендер нь Хятадын гангийн үйлдвэрүүд коксжих нүүрсний нөөцлөлт, худалдан авалтад илүү уян хатан, өрсөлдөөнт механизм нэвтрүүлж байгаагийн нэг илрэл гэж шинжээчид дүгнэж байна. Нүүрсийг Гашуунсухайт - Ганцмод боомтоор импортлох бөгөөд эхний ээлжид 300-500 мянган тонн орчим коксжих нүүрс худалдан авна гэж таамаглажээ. Мөн дэлхийн зах зээл дээр нүүрсний үнэ он гарснаас хойш уналттай байгаа энэ үед Монголын нүүрсний экспортын орлогод нөлөөлөхүйц хэмжээний гэрээ хийгдэж магадгүй хэмээн бичсэн байна.
Нөгөө талаар бүтээн байгуулалтын шав тавигдаад буй Гашуунсухайт - Ганцмод боомтын ачааллыг нэмэгдүүлэх нь гарцаагүй. "Bensteel" групп нь гангийн салбар дахь түүхий эдийн үнийг уян хатан болгоход тодорхой нөлөө үзүүлэх гэрээнүүдийг хийх боломжтой.
Тус групп нь Хятадын зүүн хойд хэсгийн Ляонин мужид байрладаг бөгөөд БНХАУ байгуулагдсаны дараа үйлдвэрлэлээ сэргээсэн анхны томоохон гангийн үйлдвэр гэдгээрээ алдартай аж.
2021 онд Хятадын томоохон гангийн үйлдвэрлэгч Ansteel-тэй нэгдэж, уламжлалт үйлдвэрлэлээс ухаалаг үйлдвэрийн хэлбэрт шилжин шинэчлэгдсэн байна.
Хятадын гангийн салбар нь удаан хугацаанд салангид бүтэцтэй, үйлдвэрийн төвлөрөл болоод үр ашигтай ажиллагаа нь саараад байсан юм. Харин 2022 онд Хятадын эрх баригчид төмөр, гангийн салбарын хөгжлийг дэмжих удирдамж гаргасан бөгөөд 2025 он гэхэд салбарын төвлөрлийг нэмэгдүүлж, сайжруулах зорилт тавиад байгаа билээ.
Энэ хүрээнд гангийн үйлдвэрүүд өндөр чанартай коксжих нүүрсний худалдан авалтыг эрэлхийлж, Хятадын зах зээлд гол тоглогчоор Австрали, Индонез нэрлэгдэж буй.
Т.БАТСҮРЭН
Эх сурвалж: NewsMetal, Khabar Asia

Нийтэлсэн огноо2025-08-05