Сүүлийн үед цахим орчинд Монгол улсын иргэд Солонгос улсын хилээр нэвтэрч чадахгүй нутаг буцах тохиолдол гарч байгаа мэдээлэл нийтлэгдсэн. Тэгвэл энэ талаар Гадаад харилцааны яамны сайд Б.Батцэцэг дараах тайлбарыг өглөө.

Тэрбээр "Усын уувал ёсыг нь дагна гэдэг шиг очсон улсынхаа хууль дүрмийг дагаж таарна. Бусдаар бол гадаад улсад оччихоод өөрийн дураараа аашилж, хэрүүл тэмцэл хийж болохгүй. Энэ нь хөгжиж байгаа монголчууд биднийг л муухай харагдуулна. Бид соёлтой аялж, зорилгоо зөв тодорхойлох хэрэгтэй байна. Виз авахдаа хэлсэн зүйл нь очоод өөр болчихдог, худал зүйл ярьдаг, тэнд хууль бусаар амьдарч байгаа монголчуудын гэрийн хаягийг нь зааж өгөх зэрэг зөрчил их гардаг. Буруутныг айлаас биш өөрсдөөсөө хайх хэрэгтэй. Өнөөдөр 60,000 гаруй монгол хүн Солонгос улсад амьдарч байгаагаас 20 мянга нь оюутнууд байна. Солонгосын талаас манай улсын 60,000 гаруй иргэнд хүндэтгэлтэй хандаж байгаа. Мөн хууль бусаар амьдарч байгаа монгол иргэн ямар нэгэн зөрчил гаргахгүй л бол бариад нутаг буцаагаад байдаггүй. Харин ч манай улсын иргэдэд сайн ханддаг.

Бид харилцан визгүй зөрчих санал тавиад таван жил болж байна. Жил бүр энэ асуудлын өндөр хэмжээнд ярдаг. Манай улсын эдийн засгийн нөхцөл байдал болон иргэдийн сахилга хариуцлага зэргээс шалтгаалаад визгүй зорчих ангилалдаа оруулахгүй байна. Бидний зүгээс эрүүл мэндийн асуудлаар зорчих иргэдийг визнээс чөлөөлөх мөн бизнес эрхлэгчид, олон удаа зөрчихдөө зөрчил гаргаагүй иргэдийг чөлөөлөхийг хүссэн. Үүнийг Солонгосын Ерөнхийлөгч, Хууль зүйн яам нь нэлээд анхаарч судалж байгаа. Манай иргэд архи ууж хоорондоо зодолдох, хулгай дээрэм, хар тамхи зэрэг олон асуудалд нэр холбогддог. Виз мэдүүлэхдээ худал хэлэх, бусдын бичиг баримтыг ашиглах зэрэг санаа зовмоор асуудал их гардаг. Жил болгон л хил дээрээс монгол иргэд буцлаа гэсэн мэдээлэл цахимаар явдаг. Үүнийг нь манай яам шалгаад Солонгосын талд хэлье гэхээр бидэнд гомдлоо огт хэлдэггүй” гэлээ.

Б.АЗЖАРГАЛ

Нийтэлсэн огноо2026-02-12