Хууль зүй, дотоод хэргийн сайд Б.Энхбаяр өнөөдөр /2026.02.12/ “Смарт эко транс” ХХК-д холбогдох хууль зөрчсөн Засгийн газрын шийдвэр, мөн улсын хилээс 0.9–2.5 км зайд орших 10 боомтод 34,227 га газар ашиглуулах шийдвэр гаргасан асуудлыг шалгуулахаар Авлигатай тэмцэх газар, Улсын ерөнхий прокурор, Цагдаагийн ерөнхий газарт өгсөн байна.

Тэрбээр өчигдөр хилийн бүсэд хууль зөрчин олгосон тусгай зөвшөөрөл хийгээд газрын талаар мэдээлэл хийх үеэрээ  "Л.Оюун-Эрдэнийн танхим Гашуунсухайт боомтод автомат удирдлагатай чингэлэг тээврийн үйл ажиллагаа эрхлэх, терминал байгуулах эрхийг сонгон шалгаруулалтгүйгээр “Смарт эко транс” ХХК –нд олгосон нь ил тод байдал, өрсөлдөөнийг хязгаарласан, нэг аж ахуй нэгжид их хэмжээний ашиг орлого олох давуу байдал бий болгосон. Цагаанхад-Гашуунсухайт чиглэлийн төрийн өмчийн 19.2 км авто замыг “Смарт эко транс” ХХК эзэмшиж, дур мэдэн төлбөр хураамж тогтоон, их хэмжээний орлого, ашиг олсон нь хууль тогтоомжийг ноцтой зөрчсөн, гэмт хэргийн шинжтэй байж болзошгүй. “Смарт эко транс” компани  Монгол Улсын хилийн бүсэд байгаа газрыг хугацаагүйгээр хувьдаа авсан зэрэг хэд, хэдэн ноцтой асуудал байгаа, хууль хяналтын байгууллагад шилжүүлж шалгуулна” гэж мэдэгдсэн юм.
Мөн “Хоёрхон жилийн дотор “Смарт эко транс” компани   95.7 тэрбум төгрөгийн ашиг хийсэн. Монгол Улсын хилийг, төрийн өмчийн газрыг өөрсдөө үнэ тариф тогтоож, хэрэг дээрээ зарж хувьдаа ийм ашиг хийсэн. Ийм учраас нүүрсний хулгайн асуудал ямар хэмжээний цар хүрээтэй өргөн асуудал байсан бэ гэдэг нь одоо ил тод болж байгаа.

Энэ компанид төрийн өмчийн авто замыг ашиглаж өөрсдөө үнэ тариф тогтоож хувьдаа аваад байна гэдэг  асуудлаар нийтдээ 14 удаагийн шаардлага өгөгдөж байсан. Хууль хяналтын байгууллага хүчтэй хөдөлж байгаагүй.

Харин 2025 оны долдугаар сарын 8-наас буюу Г.Занданшатарын танхим байгуулагдсаны дараагаас энэ асуудлыг шалгахаар хөдөлж эхэлсэн. Сая Ерөнхий сайдыг Өмнөговь аймагт ажиллах үеэр энэ этгээдүүдэд эхнээс нь эрүүгийн хэрэг үүсгэсэн. Энэний цаана ямар схем гаргаж давуу эрх олгосон бэ гэдэг асуудлыг Засгийн газрын хуралдаанд хэлэлцсэн хүрээнд танилцууллаа” гэж мэдээлсэн юм.

Нийтэлсэн огноо2026-02-13