Нийслэлийн Иргэдийн төлөөлөгчдийн хурал 2026 оны төсөвтөө тодотгол хийхээр өчигдрөөс /2026.02.24/ хэлэлцэж эхэллээ. Тодотголоос харахад, нийслэл төсвийн орлогоо хоёр сарын өмнөх 4.9 их наяд төгрөгөөс 5.4 их наяд болгон, 438 тэрбум төгрөгөөр нэмэгдүүлэхээр тооцжээ. Орлогоо ийнхүү нэмэгдүүлэх болсон шалтгаан нь “Сэлбэ 20 минутын хот корпорац”-аас хариуцан хэрэгжүүлж буй төслийн хүрээнд нийт 8575 айлын 113 блок барилгын ажлыг 2026-2027 онд эхлүүлэн ашиглалтад оруулна. Тэдгээрийг борлуулснаар 438 тэрбум төгрөгийг нэмж төвлөрүүлнэ хэмээн төсвийн тодотголд тусгажээ.

Харин зарлага талаас ихээхэн анхаарал татна. Нийслэл 2026 онд зарлагаа  5.3 их наядаас 6-6.5 их наяд төгрөг хүртэл тэлэхээр болж байна. Зарлагын хэмжээг авч үзвэл, хөрөнгө оруулалтын зардалд 371.7 тэрбум төгрөгийн нэмэлт санхүүжилт тусгасан. Үүнээс зөвхөн “Улаанбаатар трам” төсөлд 350 тэрбумыг зарцуулахаар болсон нь олон хүний шүүмжлэл дагуулах болов. Учир нь өнөөдрийн байдлаар цаасан дээр хэрэгжиж буй “Улаанбаатар трам” төсөл үр ашгийн тооцоо ч хийгдээгүй гэдгийг ИТХ-ын төлөөлөгчид хэлж байв.

Мөн нийслэлээс Дулааны тавдугаар цахилгаан станц төсөлд зориулан 200 тэрбум төгрөгийн бонд гаргаж, санхүүжилтэд зарцуулахаар тусгасан байна. “Улаанбаатар хотын хий хангамжийн удирдлагын газар”-т 1.3 тэрбум, “Улаанбаатар кабель кар” ОНӨТҮГ-т 2.4 тэрбум, “Сүү” хөтөлбөрийг өргөжүүлж, дотоодын аж ахуй нэгжүүдийг дэмжиж хөнгөлөлттэй зээл олгоход 5 тэрбум, ашиглалтын шаардлага хангахгүй түүхэн дурсгалт газруудыг сэргээн засварлах судалгаанд 100 сая төгрөгөөр нэмж зарцуулах аж.

Эдгээр үзүүлэлтээр нийслэл хот 2026 онд хамгийн багадаа 600 тэрбумаас 1.2 их наяд төгрөгийн алдагдалтай ажиллах дүр зураг харагдаж байна.

Нийтэлсэн огноо2026-02-25