Засгийн газрын ээлжит хуралдаанаас гарсан шийдвэрийг танилцуулж байна. ЗГХЭГ-ын Тэргүүн дэд дарга Б.Батцэцэг бизнесийн орчныг дэмжих чиглэлээр гарсан тогтоол болон өнгөрсөн долоо хоногт гарсан төрийн албан хаагчдыг зайнаас ажиллуулах шийдвэрийн хэрэгжилтийн талаар мэдээлэл өгөв.

Тэрбээр "МУ-ын Ерөнхий сайдын "Чөлөөлье" санаачилгын хүрээнд нийслэл дээр өгч байгаа 146 төрлийн зөвшөөрлийг мэдэгдээд шууд эхэлдэг болохоор Засгийн газрын тогтоолыг баталлаа. Тогтоол хэрэгжсэнээр фитнесс, кофе шоп, гуталчин, оёдолчин зэрэг эрсдэл багатай үйлчилгээ, бизнес эрхлэх гэж байгаа иргэд E -business платформд хүсэлтээ өгмөгц Засгийн газраас тухайн бизнесийг эрхлэх үйл ажиллагаанд шаардлагатай хууль тогтоомж, холбогдох мэдээллийг иргэний өөрийнх улсын бүртгэлтэй мэйлээр, И-Монголиагаар эсвэл мессеж хэлбэрээр мэдээлэл хүргүүлж ажиллана.

Бизнесийн үйл ажиллагаа эрхлэхтэй холбоотой төрөөс болон мэргэжлийн байгууллагаас авах аливаа дүгнэлт, тодорхойлолтыг төрийн байгууллага өөрөө иргэндээ очиж үйлчилдэг болно. Энэ хүрээнд МУ-ын төрийн аль ч байгууллага IT-ийн програм хангамж хөгжүүлэхээ болино" гэв.

Д.ХАДААН

Нийтэлсэн огноо2026-04-15