Гадаад валютын улсын нөөц энэ оны дөрөвдүгээр сарын байдлаар 7.2 тэрбум ам.долларт хүрсэн билээ. 2026 оны нэгдүгээр улирлын эцсийн гүйцэтгэлээр 7.1 тэрбум ам.долларт хүрсэн нь оны эхнээс 182.5 сая ам.доллароор өсөж, түүхэн дээд түвшинд хүрсэн үзүүлэлт болсон.

Энэ нь валютын төлбөртэй барааны импортын 8.4 сарын хэрэгцээ, бараа болон үйлчилгээний импортын 5.6 сарын хэрэгцээ, богино хугацаат гадаад өр төлбөрийг 275 хувь тус тус хангах түвшинд буюу олон улсад өргөн ашигладаг нөөцийн хүрэлцээт байдлыг шалгуурыг хангаж буй талаар Монголбанк мэдээлсэн билээ.

Харин тавдугаар арын эхний долоо хоногийн байдлаар гадаад валютын улсын нөөц 7.3 тэрбум ам.долларт хүрч ойролцоогоор 140 сая ам.доллароор өссөн байна. Энэ нь өнгөрсөн оны мөн үеийнхтэй харьцуулахад 42 хувь буюу 2.1 тэрбум ам.доллароор өссөн үзүүлэлт юм.

Хуульд зааснаар Монголбанк дахь гадаад валютын улсын нөөц нь дараах төрлийн активаас бүрдэнэ:

Гадаад орны банк, санхүүгийн байгууллагад хадгалж байгаа мөнгөжсөн алт;
Бэлэн ба бэлэн бус хэлбэрээр байгаа чөлөөтэй хөрвөдөг гадаад валют;
Чөлөөтэй хөрвөдөг гадаад валютаар чөлөөтэй төлөгдөх вексель;
Гадаад орны Засгийн газар, төв банк, олон улсын санхүүгийн байгууллагаас гаргасан буюу баталгаажуулсан чөлөөтэй хөрвөдөг гадаад валютаар нэрлэсэн, түүгээр төлөгдөх бүх төрлийн үнэт цаас;
Олон улсын хэмжээнд гадаад валютын нөөцөд тооцогдох бусад актив
Т.БАТСҮРЭН

Нийтэлсэн огноо2026-05-06