МАН-аас орон нутгийн нөхөн сонгуулийн талаар мэдээлэл хийлээ. Хэвлэлийн хуралд намын Ерөнхий нарийн бичгийн дарга Я.Содбаатар, Нарийн бичгийн дарга Ө.Золбаяр нар оролцов.
Энэ удаагийн орон нутгийн нөхөн сонгууль зургадугаар сарын 21-нд улс орон даяар зохион байгуулсан. Энэ жил 5 аймаг 9 суманд нөхөн сонгууль болсон. Аймгийн ИТХ-ын 9 мандат, сумын 37 мандат дээр нөхөн сонгууль явуулсан. МАН-аас  42, АН-аас 40, ХҮН намаас 3, бие даагч 5, нийт 93 нэр дэвшигч өрсөлджээ.
МАН-ын Ерөнхий нарийн бичгийн дарга Я.Содбаатар “46 мандатаас МАН 26 мандат буюу 56.5 хувийн саналаар ялалт байгууллаа. АН 17 мандат буюу 36.9, ХҮН нам нэг мандат, хоёр бие даагч ялсан байна. Аймгийн ИТХ-ын 9 суудалд МАН ялалт байгуулсан. Энэ удаагийн сонгуульд аймгийн ИТХ-ын нөхөн сонгуульд нэлээд ач холбогдол өгсөн.
МАН-ын шинэ удирдлага “МАН ард түмэндээ эргэн ирнэ” уриан дор ажиллаж байна. Намын дарга 11, би 19 аймагт ажиллаад байна. Намын шинэ даргын дэвшүүлж байгаа олон бодлогыг ард иргэд ярьж, дэмжиж байгаагаа илэрхийлсэн. Энэ нь ч ард иргэдийн өгсөн саналаар баталгаажлаа" гэлээ.
Мөн тэрээр Ерөнхийлөгчийн сонгуульд нэр дэвшигчийг хэрхэн тодруулах вэ гэсэн асуултад "МАН Ерөнхийлөгчийн сонгуульд нэр дэвшигчээ ард түмний дунд санал асуулга явуулж тодруулна" гэсэн юм.

Пүрэвдагва БУЛГАН

Сэтгүүлч М.Булган нь iToim.mn сайтад 2015 оноос ажиллаж байна. Улс төр, нийгмийн чиглэлээр мэдээ, мэдээлэл бэлтгэдэг.

Нийтэлсэн огноо2026-06-22