“Ази тивд биоаюулгүй байдлын үндэсний тогтолцоог бэхжүүлэхэд биотехнологийн аюулгүй хэрэглээг олон улсын хамтын ажиллагааны хүрээнд дэмжих нь” төслийн олон улсын семинар, уулзалт Улаанбаатар хотноо энэ сарын 6-10-нд болж байна. 

Тус уулзалтыг БОУАӨЯ, НҮБ-ын Байгаль орчны хөтөлбөр (UNEP), Даян дэлхийн байгаль хамгаалах сан (GEF), БНСУ-ын Азийн Биоаюулгүй байдлын хамтын ажиллагааг дэмжих хүрээлэн (KIPABiC)-тэй хамтран хэрэгжүүлж буй төслийн хүрээнд зохион байгуулж буй юм.

Монгол Улс Биологийн олон янз байдлын тухай конвенцын Биоаюулгүй байдлын тухай Картагений протоколд 2002 онд нэгдэн орсон бөгөөд биоаюулгүй байдлын үндэсний тогтолцоог хөгжүүлэх, хууль эрх зүйн орчныг боловсронгуй болгох, хүний нөөцийн болон техникийн чадавхыг бэхжүүлэх чиглэлээр үе шаттай арга хэмжээг хэрэгжүүлж ирсэн. 

Уулзалтад Монгол, Бангладеш, БНЭУ, Филиппин зэрэг улсын төрийн байгууллагууд болон олон улсын байгууллагын мэргэжилтнүүд, төслийн хэрэгжүүлэгч байгууллагуудын төлөөлөл оролцож байна.

Төслийн хүрээнд дээрх улсуудын биоаюулгүй байдлын үндэсний тогтолцоог бэхжүүлэх, хувиргасан амьд организмтай холбоотой бодлого, зохицуулалтыг сайжруулах, эрсдэлийн үнэлгээ, хяналт шинжилгээ, лабораторийн чадавхыг нэмэгдүүлэх чиглэлээр хамтран ажиллах юм.

Уулзалтын үеэр оролцогчид биоаюулгүй байдлын үндэсний тогтолцооны өнөөгийн нөхцөл байдал, тулгамдсан сорилтууд, эрсдэлийн үнэлгээ ба удирдлага, хууль эрх зүйн орчин, байгууллагуудын уялдаа холбоо, лабораторийн болон хүний нөөцийн чадавхыг бэхжүүлэх асуудлыг хэлэлцэж, улс орнуудын туршлага, шилдэг практикийг солилцож байна. Мөн мэдээлэл солилцооны Biosafety Clearing-House (BCH) платформын хөгжил, бүс нутгийн хамтын ажиллагааг өргөжүүлэх боломжийн талаар хэлэлцэх юм.

Болор.Ж

Нийтэлсэн огноо2026-07-06