УИХ-ын ээлжит бус чуулганыг есдүгээр сард 7-нд товложээ. Уг шийдвэрийг УИХ-ын даргын дэргэдэх зөвлөлийн өнөөдрийн хуралдаанаас гаргасан байна. Ээлжит бус чуулганаар Засгийн газраас өргөн мэдүүлсэн Монгол Улсын 2026 оны төсвийн тодотгол болон холбогдох бусад хуулийн төслүүдийг хэлэлцэн шийдвэрлэнэ гэж УИХ-ын дарга С.Бямбацогт мэдэгдэв. УИХ-ын ээлжит бус чуулганыг есдүгээр сарын 7-14-ний хооронд хуралдуулахаар болжээ.

Ирэх 7 хоногт ээлжит бус чуулган хуралдана

УИХ-ын даргын дэргэдэх зөвлөл өнөөдөр /2026.09.02/ хуралдаж, 2026 оны есдүгээр сарын 7-нд ээлжит бус чуулган зарлахаар болжээ. Ээлжит бус чуулганаар төсвийн тодотголын асуудлыг хэлэлцэх гэнэ. Ардчилсан намаас ээлжит бус чуулган зарлаж, төсвийн тодотгол хэлэлцэхийг шаардсан юм.

Ээлжит бус чуулган хуралдах талаар УИХ-ын дарга С.Бямбацогт өмнө нь мэдээлэл өгөхдөө “Засгийн газраас улсын төсвийн тодотголын төслийг УИХ-д өргөн барьсан. Улсын төсвийн орлого биелэхгүй байна. Төсвийн алдагдлыг санхүүжүүлэх, хэмнэлт хийх, үнийн өсөлтийг ард иргэдэд үүрүүлэхгүй байх, төр бүсээ чангалж, иргэдийн цалин, тэтгэврийг нэмэх асуудлыг заавал он гарахыг хүлээхгүйгээр шийдэх шаардлагатай байна гэж үзсэн юм билээ. Төсвийн тодотголыг хэлэлцэхэд тодорхой хуулийн шаардлага байдаг. Өөрөөр хэлбэл, Үндэсний аудитын дүгнэлт гарах ёстой. Төсвийн тогтвортой байдлын тухай хууль, Төсвийн тухай хууль зэрэг холбогдох хуулийг зөрчсөн байна уу гэдгийг үзэх шаардлагатай. Мөн Төсвийн тогтвортой байдлын зөвлөл бас дүгнэлтээ гаргах ёстой. Тийм учраас есдүгээр сар гараад Төсвийн тогтвортой байдлын зөвлөлийн болон Үндэсний аудитын газрын дүгнэлт гарчих байх. Тэр үед нь УИХ-ын даргын дэргэдэх зөвлөлийг хуралдуулна. Одоогоор есдүгээр сарын 1-ний өдөр хуралдуулах бодолтой байна. Ингэснээр ээлжит бус чуулганыг хуралдуулж, төсвийн тодотголыг хэлэлцэх байр суурьтай байна. Тэр болтол тодорхой бэлтгэл хангах ёстой. Сөрөг хүчний зүгээс ээлжит бус чуулганыг хуралдуулж, төсвийн тодотголыг хэлэлцэх саналыг тавьж байгаа. Хэрэв тийм бол 42 гишүүн гарын үсгээ зурж, ээлжит бус чуулганыг хуралдуулах саналаа гаргах боломжтой. Миний хувьд ээлжит бус чуулган хуралдуулах саналтай байгаа" гэсэн юм.

Нийтэлсэн огноо2026-09-02