Засгийн газрын ээлжит хуралдаанаар Гадаадын хөрөнгө оруулалтыг татах цогц үйл ажиллагааны төлөвлөгөгөөг хэлэлцэн баталлаа.
Монгол Улсад 1990-2025 оны хооронд нийтдээ 52.3 тэрбум ам.долларын гадаадын хөрөнгө оруулалт хийгджээ. Эдгээрийг улсаар нь авч үзбэл:
Нидерланд-44.5 хувь
БНХАУ 12.6 хувь
Сингапур улс 8.2 хувийг эзэлж байна.
Хөрөнгө оруулалтын дийлэнх нь буюу 75 орчим хувь нь уул уурхайн салбарт байгаа бол үлдсэн нь бөөний болон жижиглэн худалдаа, санхүү, даатгал, барилгын салбарт хийгджээ. Засгийн газраас гадаад, дотоодын хөрөнгө оруулалт татах, идэвхжүүлэх, урт хугацаанд үргэлжлүүлэх, хамгаалах, дэмжих цогц ажиллагааны төлөвлөгөөг баталлаа. Манай улс цаашид сэргээгдэх эрчим хүч, хиймэл оюун, дата төв, уул уурхай, хөдөө аж ахуй, аялал жуулчлал гэсэн 5 салбарт гаднын хөрөнгө оруулалтыг түлхүү татах бодлого баримтлах аж.
Шадар сайд Т.Доржханд: Өнгөрсөн хаврын чуулганаар Эдийн засгийн эрх чөлөөний тухай хууль болон үүнийг дагалдуулан хөрөнгө оруулалтын тухай хуулийг баталсан. Энэхүү хуулиар манайд хөрөнгө оруулсан тохиолдолд хөрөнгө оруулалт нь хамгаалагдана. Мөн урт хугацаанд үр ашгаа аваад гарах боломж нөхцөлийг нь бий болгож байгаа. Хуулийг ажил хэрэг болгохын тулд Худалдаа хөрөнгө оруулалтын агентлаг ажиллаж байна. Гадаадын хөрөнгө оруулагч нар Засгийн газартай холбоотой гомдол саналаа энэ агентлагт хүсэлтээр өгч болно. Энэ дагуу тус агентлаг холбогдох яам, орон нутагт 30 хоногийн дотор шийдвэрлэх чиглэл өгөх юм.
Хэрвээ та дээр дурдсан таван чиглэлээр хөрөнгө оруулалт хийвэл гаалийн тариф байхгүй. НӨАТ-ийг төсөл хэрэгжиж дууссаны дараа буюу 4 жилийн дараагаас төлөх боломжтой. Томоохон хэмжээний аж үйлдвэрийн үйл ажиллагаа явуулсан тохиолдолд холбогдох хөнгөлөлтүүдэд хамаарах бүрэн боломжтой. Хамгийн чухал нь 100 тэрбум төгрөгөөс дээш хөрөнгө оруулталт хийсэн тохиолдолд 20 жилийн тогтворжуулагчийн гэрчилгээг гаргаж өгж байгаа юм. Хөрөнгө оруулагчид Засгийн газар солигдохоос үл хамааран 20 жилийн хугацаанд тухайн татварын орчинд тогтворжиж үйл ажиллагаа явуулах боломж бүрдэж байна гэв.

Рэгзэдмаа ЭРДЭНЭЧИМЭГ

Р.Эрдэнэчимэг нь 2022 онд Их засаг их сургуулийг сэтгүүлч мэргэжлээр төгссөн бөгөөд 2026 оноос iToim.mn сайтад ажиллаж байна.

Нийтэлсэн огноо2026-09-23