Оны эхний 10 сарын байдлаар орон сууцны үнэ өмнөх оны мөн үеэс 6.8 хувь, өмнөх сараас 0.5 хувиар өсжээ. Тодруулбал, шинэ орон сууцны үнэ өмнөх оныхоос 4.9 хувиар өссөн бол хуучин орон сууцны үнэ 7.3 хувиар тус тус өссөн байна.
Аравдугаар сарын байдлаар шинэ орон сууцны нэг метр квадрат талбайн дундаж үнэ 4.83 сая төгрөг байгаа бөгөөд Сүхбаатар дүүрэгт хамгийн өндөр буюу 5 сая 500 мянга байна. Сонгинохайрхан дүүрэгт шинэ орон сууцны үнэ дундаж үнэ өмнөх оны мөн үеийнхээс 3 хувиар өссөн. Харин хуучин орон сууцны нэг метр квадрат талбайн дундаж үнэ 4.9 сая төгрөг болсон бөгөөд Сүхбаатар дүүрэгт хамгийн өндөр буюу 5.97 сая төгрөгийн үнэтэй байна.
Байршлаар нь авч үзвэл, Сүхбаатар дүүргийн Сүхбаатарын талбай, 220 мянгат орчимд нэг метр квадрт талбайн дундаж үнэ 8.11 сая төгрөг байгаа нь хамгийн өндөр, Сонгинохайрхан дүүрэгт 21 хороолол орчим 3.3 сая төгрөг байгаа нь хамгийн хямд байна.
Түрээсийн байрны хувьд нэг өрөө байрны сарын дундаж түрээс 1.4 сая орчим байгаа бол хоёр өрөө 1.9 сая, гурван өрөө байрных 3.6 сая төгрөг байгаа юм. Орон сууцны нэг сарын түрээсийн дундаж үнийг байршлаар нь харвал Сүхбаатар дүүрэгт хамгийн үнэтэй. Сонгинохайр дүүрэгт хамгийн хямд түрээслэх боломжтой байр байна. Тодруулбал, Сүхбаатар дүүрэгт 1-3 өрөө байр 1.6-3.6 сая төгрөг. Сонгинохайрхан дүүрэгт 1 сая 090 мянган төгрөгөөс 1.7 сая төгрөг байна.
Рэгзэдмаа ЭРДЭНЭЧИМЭГ

Р.Эрдэнэчимэг нь 2022 онд Их засаг их сургуулийг сэтгүүлч мэргэжлээр төгссөн бөгөөд 2026 оноос iToim.mn сайтад ажиллаж байна.

Нийтэлсэн огноо2026-11-12